इरानी मिसाइल प्रहारबाट अबु धाबीमा एक जनाको मृत्यु भएपछि यूएई क्रुद्ध

अबु धाबी। इरानले प्रहार गरेको मिसाइलका कारण संयुक्त अरब इमिरेट्स (यूएई) को राजधानी अबु धाबीमा एक जनाको मृत्यु भएपछि यूएई सरकार क्रुद्ध बनेको छ ।

यूएईको आधिकारिक समाचार एजेन्सीका अनुसार इरानबाट प्रहार गरिएका कैयौँ मिसाइलहरूलाई हवाई रक्षा प्रणालीमार्फत बीचमै नष्ट गरिए पनि अबु धाबीमा कम्तीमा एक जनाको मृत्यु भएको छ । मिसाइलका टुक्रा लागेर अज्ञात एशियाली देशका एक नागरिकको ज्यान गएको अन्तर्राष्ट्रिय सञ्चार माध्यमहरूले जनाएका छन् ।

यूएईले यो आक्रमणलाई ‘राष्ट्रिय सार्वभौमसत्ता र अन्तर्राष्ट्रिय कानुनको घोर उल्लङ्घन’ भन्दै कडा आपत्ति जनाएको छ । सरकारले जारी गरेको विज्ञप्तिमा यस्तो उत्तेजक कार्यको जवाफ दिने ‘सम्पूर्ण अधिकार सुरक्षित’ रहेको स्पष्ट पारेको छ ।

यो घटना इजरायल तथा अमेरिकाको संयुक्त आक्रमणपछि इरानले खाडी क्षेत्रका अमेरिकी सैन्य अड्डाहरू तथा इजरायल निकट क्षेत्रमा गरेको ठूलो जवाफी हमलाको क्रममा भएको हो । अबु धाबीमा रहेको अल धाफ्रा एयर बेस (अमेरिकी सैन्य अड्डा) लाई पनि निशाना बनाइएको थियो ।

यूएईको रक्षा मन्त्रालयले हवाई रक्षा प्रणालीले धेरै मिसाइल रोके पनि केही टुक्रा खसेर क्षति भएको पुष्टि गरेको छ । घटनापछि अबु धाबीमा सुरक्षा व्यवस्था कडा पारिएको छ ।

यो आक्रमणले खाडी क्षेत्रमा तनाव थप बढाएको छ । लाखौं नेपालीहरू कार्यरत रहेको यूएईमा नेपाली समुदायमा पनि चिन्ता बढेको छ । नेपाल सरकार तथा नेपाली दूतावासले आवश्यक सुरक्षा तथा जानकारीका लागि उच्च सतर्कता अपनाएको छ ।

इरान–इजरायल द्वन्द्वले अब खाडी मुलुकहरूलाई पनि प्रत्यक्ष चपेटामा पारेको छ । स्थिति अझै तनावपूर्ण बनेको छ र थप जवाफी कारबाहीको सम्भावना बढेको छ ।

प्रकाशित मिति: १६ फाल्गुन २०८२, शनिबार