काठमाडौं । राष्ट्रिय प्रजातन्त्र पार्टी (राप्रपा) ले रूपन्देही क्षेत्र नम्बर २ मा कांग्रेसलाई समर्थन गर्ने निर्णय गरेको समाचार पूर्णतया गलत भएको स्पष्ट पारेको छ।
सोमबार राप्रपाका केन्द्रीय प्रवक्ता तथा प्रचार विभाग प्रमुख मोहनकुमार श्रेष्ठले आगामी फागुन २१ गते हुने प्रतिनिधिसभा निर्वाचनका लागि राप्रपाले कसैसँग तालमेल वा समर्थन गर्ने नीति नलिएको जानकारी दिएका छन्।
उनले भने, ‘राप्रपाले आगामी निर्वाचनमा कसैसँग तालमेल वा समर्थन गर्ने नीति बनाएको छैन। पार्टीको नीति विपरीत यस्ता गतिविधिमा संलग्न हुने व्यक्ति अनुशासनको विषय बन्नेछ। प्राविधिक कारणले उम्मेदवार नहुँदा समानुपातिक मत जुटाउन पार्टी र मतदातालाई अनुरोध गर्दछौं।’
यसअघि क्षेत्रीय अध्यक्ष रामबहादुर थापाले प्राविधिक कारणले उक्त क्षेत्रको उम्मेदवारी फिर्ता लिएको जानकारी दिएका थिए।
थापाले आइतबार विज्ञप्ति जारी गर्दै कांग्रेसका उम्मेदवार चुन्नप्रसाद शर्मा (पौडेल) लाई समर्थन गर्ने निर्णय भएको दाबी गरेका थिए र समानुपातिक मतमा राप्रपालाई मत दिन आग्रह गरेका थिए। तर राप्रपाले ती दाबीलाई पूर्णतया असत्य भएको प्रस्ट पारेको छ।
प्रकाशित मिति: १८ फाल्गुन २०८२, सोमबार
प्रतिक्रिया