काठमाडौं । धनगढी–१३ कैलाली गाउँमा मंगलबार साँझ होली खेल्ने क्रममा भएको झडपमा प्रहरीले आक्रमण गरेको समूहका १२ जनामाथि जिल्ला प्रहरी कार्यालय कैलालीले विस्तृत अनुसन्धान सुरु गरेको छ। झडपका क्रममा टाउकोमा गहिरो चोट लागेका असई डबल साउदको स्वास्थ्य अवस्था अझै गम्भीर रहेको प्रहरीले जनाएको छ।
होली खेल्ने क्रममा दुई पक्षबीच सुरु भएको विवादले उग्र रूप लिँदा मंगलबार हिंसात्मक झडप भएको थियो। प्रहरी घटनाको कारणबारे अनुसन्धान गरिरहेको छ।
जिल्ला प्रहरी कार्यालय कैलालीका एसपी नरेन्द्र चन्दका अनुसार, घटनास्थलबाट नियन्त्रणमा लिइएका १२ जनामाथि मंगलबार बिहानैदेखि सोधपुछ र अनुसन्धान अघि बढाइएको छ। प्रारम्भिक तथ्याङ्कले देखाउँछ कि झगडा बालबालिकाबीच सुरु भए पनि पछि ठूला व्यक्तिहरूले समेत प्रहरीमाथि आक्रमण गरेकाले यो योजनावद्ध हमला हो कि मात्र उत्तेजनामा भएको हो भन्ने विषयमा अनुसन्धान केन्द्रित गरिएको छ।
घटनामा घाइते असई डबल साउदको टाउकोमा गम्भीर चोट लागेको र उनको अवस्था चिन्ताजनक रहेको छ। हाल उनी माया मेट्रो अस्पतालमा उपचाररत छन्। त्यस्तै, घाइते इन्स्पेक्टर बलराम पाण्डे र अन्य दुई जनाको पनि सोही अस्पतालमा उपचार भइरहेको छ।
मंगलबार साँझको झडपका क्रममा स्थिति नियन्त्रणमा लगाउन पुगेको प्रहरी टोलीमाथि स्थानीयहरूले आक्रमण गरेका थिए। भिड अनियन्त्रित भएपछि प्रहरीले ६ राउण्ड हवाई फायर गर्दै स्थिति नियन्त्रणमा ल्याएको थियो। यस क्रममा प्रहरीले प्रयोग गरेको गाडीमा समेत क्षति पुगेको थियो।
घटनापछि थप हिंसा रोक्न नेपाली सेना, सशस्त्र प्रहरी र नेपाल प्रहरीको संयुक्त टोली परिचालन गरिएको थियो।
प्रकाशित मिति: २० फाल्गुन २०८२, बुधबार
प्रतिक्रिया