काठमाडौं। अमेरिकाको न्युयोर्क शहरका मेयर जोहरान ममदानीले इरानी सरकारको कडा आलोचना गरेका छन् । इरान र मध्यपूर्वमा जारी तनाव तथा द्वन्द्वबारे प्रतिक्रिया दिँदै उनले इरानी सरकारले आफ्नै जनतामाथि क्रमिक रूपमा दमन गरेको आरोप लगाएका हुन् ।
बीबीसीसँग कुराकानी गर्दै मेयर ममदानीले भने, “इरानको सरकारले आफ्नै जनतामाथि क्रमिक रूपमा दमन गरेको छ । यस वर्षको सुरुवातमा सामान्य विरोध प्रदर्शन गर्ने हजारौं इरानीहरू मारिएका थिए । यो एक क्रूर सरकार हो ।”
उनले थप भने, “म युवा मेयर भए पनि केही वर्षअघि यही क्षेत्रमा शासन परिवर्तनको उद्देश्यले गरिएका युद्धहरूले कति विनाशकारी परिणाम ल्याए भन्ने कुरा मलाई राम्रोसँग सम्झना छ ।” ममदानीले कुनै पनि देशमा शासन परिवर्तन गर्ने उद्देश्यले गरिने युद्धको पनि आलोचना गरेका छन् ।
यो आलोचना इजरायल तथा अमेरिकाको संयुक्त आक्रमणपछि इरानमा उत्पन्न राजनीतिक तथा सुरक्षा संकटको पृष्ठभूमिमा आएको हो । इरानमा सर्वोच्च नेता आयातोल्लाह अली खामेनीको हत्या पछि संक्रमणकालीन नेतृत्व परिषद् गठन भएको छ भने देशभर विरोध प्रदर्शन तथा असन्तुष्टि बढेको छ ।
मेयर ममदानीको यो भनाइले अन्तर्राष्ट्रिय स्तरमा इरानको आन्तरिक दमन तथा क्षेत्रीय द्वन्द्वप्रति ध्यानाकर्षण गराएको छ । उनले इरानी जनताको पक्षमा बोले पनि शासन परिवर्तनका लागि बाह्य हस्तक्षेपको विरोध गरेका छन् ।
मध्यपूर्वमा तनाव चर्किँदै गएको बेला यो आलोचनाले राजनीतिक बहसलाई थप तीव्र बनाएको छ ।
खाडी क्षेत्रमा कार्यरत लाखौं नेपाली श्रमिकहरूको सुरक्षा पनि जोखिममा परेको छ । नेपाल सरकारले इजरायल तथा इरानमा रहेका नेपालीहरूलाई उच्च सतर्कता अपनाउन तथा अनावश्यक यात्रा नगर्न यसअघि नै एडभाइजरी जारी गरिसकेको छ ।
प्रकाशित मिति: २० फाल्गुन २०८२, बुधबार
प्रतिक्रिया