काठमाडौं । सहिद लखन गाउँपालिका–३ कन्टारमा गाडी दुर्घटना हुँदा ७ जनाको मृत्यु भएको छ।
शुक्रबार साँझ करिब ७:५५ बजे मनकामना मन्दिर बाट दर्शन गरेर फर्किँदै गरेका यात्रु बोकेको गाडी आँबुखैरेनीतर्फ आउने क्रममा अनियन्त्रित भई सडकबाट करिब २०० मिटर तल खसेर दुर्घटना भएको हो।
सशस्त्र प्रहरी बल नेपाल का डिएसपी तथा सह–प्रवक्ता शैलेन्द्र थापा का अनुसार गाडीमा चालकसहित १४ जना सवार थिए। तीमध्ये ७ जनाको घटनास्थलमै मृत्यु भएको छ।
मृतकमध्ये ५ जना पुरुष र २ जना महिला रहेका छन्। उनीहरूको पहिचान भने खुल्न बाँकी छ। बागमती प्रदेश ००६ ख ८४३० नम्बरको गाडीमा भारतीय यात्रुहरू सवार रहेको बताइएको छ।
दुर्घटनामा अन्य ७ जना घाइते भएका छन्। घाइतेहरूलाई उपचारका लागि आँबुखैरेनी पठाइएको छ। दुर्घटनास्थल आँबुखैरेनी–गोरखा सडक खण्डबाट भित्र पर्ने क्षेत्रमा रहेको जनाइएको छ।
नेत्रप्रसाद शर्मा, गोरखा जिल्ला का सहायक प्रमुख जिल्ला अधिकारीका अनुसार दुर्घटनास्थलमा नेपाल प्रहरी, सशस्त्र प्रहरी बल नेपाल, नेपाली सेना तथा स्थानीयवासी परिचालित भएका छन्।
उनका अनुसार घटनाबारे विस्तृत विवरण संकलन गर्ने काम भइरहेको छ।
प्रकाशित मिति: १ चैत्र २०८२, आइतबार
प्रतिक्रिया