काठमाडौं । प्रतिनिधि सभामा गुल्मी–१ बाट निर्वाचित सागर ढकालले प्रधानमन्त्री सुशीला कार्कीलाई हिजोका केही नियुक्तिसम्बन्धी निर्णय सच्याएर गल्ती स्वीकार गर्न आग्रह गरेका छन्। आइतबार बसेको मन्त्रिपरिषद् बैठकमा भएका केही निर्णयले पूर्व योगदानहरू ओझेलमा पर्न सक्ने स्थिति सिर्जना गरेको भन्दै उनले ती निर्णय पुनर्विचार गर्न सरकारसँग अनुरोध गरेका हुन्।
सरकारले प्रधानमन्त्रीका स्वकीय सचिवलाई प्रकृति संरक्षण कोषमा नियुक्त गर्ने निर्णय गरेको थियो भने गृहमन्त्री ओमप्रकाश अर्याललाई राष्ट्रिय सभा सदस्यमा मनोनयनका लागि राष्ट्रपतिसमक्ष सिफारिस गर्ने निर्णय पनि भएको थियो। ओमप्रकाश अर्याल पनि गुल्मी जिल्लाका हुन्।
ढकालले सोमबार सामाजिक सञ्जालमार्फत आफ्नो विचार व्यक्त गर्दै भनेका छन् कि प्रधानमन्त्रीले निर्णय सच्याएर उदारता देखाउनुपर्नेछ। उनले प्रधानमन्त्रीलाई सम्मान गर्दै निर्णय पुनर्विचार गर्न आग्रह गरेका छन्।
ढकालले लेखेका छन्, “आमा, जतिसुकै ठूलो महामानव भए पनि गल्ती हुन सक्छ। हजुरले देशलाई ठूलो निकास दिनुभएको छ, हृदयदेखि सम्मान छ। जाँदाजाँदै हिजोका निर्णय सच्याएर उदारता देखाउनुहुनेछ भन्ने कामना गरेका छौँ।”
साथै उनले उल्लेख गरेका छन् कि कुनै विशेषज्ञता वा अनुभवबिनै प्रधानमन्त्रीका स्वकीय सचिव भएको आधारमा प्रकृति संरक्षण कोष जस्तो जिम्मेवार निकायको नेतृत्व दिनु उपयुक्त नहुने कुरा स्पष्ट छ। उनले थपे, “न कुनै विज्ञता, न अनुभव—मात्र योग्यता प्रधानमन्त्रीको स्वकीय सचिव। यत्तिको आधारमा प्रकृति संरक्षण कोष जस्तो देशको जिम्मेवार निकाय सुम्पिन मिल्छ र? हामीलाई अब नातावाद र कृपावादको अन्त्य गर्नु छ।”
ढकालले प्रधानमन्त्रीले निर्णय सच्याएर उदारता देखाउने अपेक्षा व्यक्त गरेका छन्।
प्रकाशित मिति: २ चैत्र २०८२, सोमबार
प्रतिक्रिया