एजेन्सी । अमेरिकी राष्ट्रपति डोनाल्ड ट्रम्पले इरानसँगको तनाव अन्त्य गर्ने उद्देश्यले भइरहेको पछिल्लो वार्ता सकारात्मक र उपलब्धिमूलक रहेको बताएका छन्।
पछिल्ला दुई दिनदेखि जारी उच्चस्तरीय छलफलपछि उनले मध्यपूर्वमा चुलिँदै गएको द्वन्द्व समाधानतर्फ महत्वपूर्ण प्रगति भएको संकेत दिएका हुन्। ट्रम्पले आफ्नो सामाजिक सञ्जाल ‘ट्रुथ सोसल’ मार्फत वार्ता गम्भीर, विस्तृत र रचनात्मक ढंगले अघि बढिरहेको उल्लेख गरेका छन्। साथै, यही सकारात्मक वातावरणलाई निरन्तरता दिन इरानसँगको संवाद यसै हप्ताभर जारी रहने जानकारी दिएका छन्।
अमेरिकाले इरानसँग देखिएको तनाव समाधानका लागि कूटनीतिक पहललाई तीव्र बनाएको देखिन्छ। वार्तालाई निष्कर्षमा पुर्याउने उद्देश्यले ट्रम्पले अमेरिकी रक्षा मन्त्रालयलाई इरानका ऊर्जा पूर्वाधार तथा पावर प्लान्टहरूमा सम्भावित सैन्य आक्रमण पाँच दिनका लागि स्थगित गर्न निर्देशन दिएका छन्।
उनका अनुसार यो निर्णय वार्तालाई सकारात्मक दिशामा अगाडि बढाउनका लागि लिइएको हो, र आगामी प्रगतिका आधारमा थप कदम तय गरिनेछ।
अमेरिका–इरानबीचको यो संवादले केही समयदेखि तनावग्रस्त मध्यपूर्व क्षेत्रमा शान्ति कायम हुने आशा बढाएको विश्लेषण गरिएको छ।
प्रकाशित मिति: ९ चैत्र २०८२, सोमबार
प्रतिक्रिया