काठमाडौं। सङ्घीय संसद् सचिवालय ले प्रतिनिधिसभाका नवनिर्वाचित सदस्यहरूलाई जेठ १० गतेभित्र अनिवार्य रूपमा आफ्नो सम्पत्ति विवरण बुझाउन निर्देशन दिएको छ।
सचिवालयका प्रवक्ता एकराम गिरी का अनुसार सांसदहरूले तोकिएको समयसीमाभित्र सांसद सुविधा व्यवस्थापन शाखामा सम्पत्ति विवरण दर्ता गराउनुपर्नेछ।
यो व्यवस्था भ्रष्टाचार निवारण ऐन २०५९ तथा अख्तियार दुरुपयोग अनुसन्धान आयोग ऐन २०४८ अनुसार गरिएको हो। यी कानुनअनुसार सार्वजनिक पदमा नियुक्त व्यक्तिले जिम्मेवारी सम्हालेको मितिले ६० दिनभित्र आफ्नो तथा परिवारको नाममा रहेको सम्पत्तिको स्रोतसहितको विवरण पेश गर्नुपर्ने प्रावधान छ।
नवनिर्वाचित सांसदहरूले चैत १२ गते पद तथा गोपनीयताको शपथ लिएका थिए। सोही आधारमा ६० दिनको समयसीमा जेठ १० गते पुग्ने भएकाले उक्त मितिभित्र सम्पत्ति विवरण बुझाउन निर्देशन दिइएको हो।
प्रकाशित मिति: १५ चैत्र २०८२, आइतबार
प्रतिक्रिया