काठमाडौं । कास्कीको लिची बगान घुस प्रकरणमा मुछिएका पूर्वमन्त्रीद्वय राजकुमार गुप्ता र रञ्जिता श्रेष्ठ विरुद्धको भ्रष्टाचार मुद्दा सर्वोच्च अदालतमा सुनुवाइका लागि पेसी तोकिएको छ।
मंगलबार सर्वोच्च अदालत का न्यायाधीश नहकुल सुवेदी र श्रीकान्त पौडेलको संयुक्त इजलासमा मुद्दा पेश हुने भएको हो।
यसअघि विशेष अदालत ले गुप्तालाई पुर्पक्षका लागि थुनामा पठाउने आदेश दिएपछि उनी उक्त आदेशविरुद्ध सर्वोच्च पुगेका हुन्। सोही मुद्दामा पूर्वमन्त्री श्रेष्ठ र तत्कालीन मालपोत कार्यालय कास्कीका प्रमुख रामचन्द्र अधिकारीलाई पनि संगै राखेर सुनुवाइ हुँदैछ।
विशेष अदालतले श्रेष्ठ र अधिकारीलाई जनही ५ लाख रुपैयाँ धरौटीमा छाड्ने आदेश दिएको थियो। उक्त आदेश बदर गर्न माग गर्दै अख्तियार दुरुपयोग अनुसन्धान आयोग सर्वोच्च अदालत पुगेको हो।
पोखरास्थित लिचीबारी घुस प्रकरणमा गुप्ताले मालपोत प्रमुखको सरुवा रोक्ने र भूमि आयोगमा नियुक्ति दिलाउने आश्वासन दिएर ५३ लाख रुपैयाँ घुस लिएको आरोप छ। साथै, राजकुमार गुप्ता र रञ्जिता श्रेष्ठ ले मिलेमतोमा २५ लाख रुपैयाँ घुस लिएको अभियोग पनि लगाइएको छ।
गुप्ताले भने अदालतमा आफू निर्दोष रहेको र घुस नलिएको दाबी गरेका छन्। तर, प्रारम्भिक प्रमाणका आधारमा अदालतले उनलाई तत्काल निर्दोष मान्न नसकिने ठहर गरेको छ।
प्रकाशित मिति: १७ चैत्र २०८२, मंगलबार
प्रतिक्रिया