काठमाडौं । नेपाल कम्युनिस्ट पार्टीका अध्यक्ष ऋषिराम कट्टेलले नेकपा (एमाले)का अध्यक्ष केपी शर्मा ओलीको पक्राउबारे सकारात्मक दृष्टिकोण राखेका छन्। कट्टेलका अनुसार, जेन–जी घटनासँग सम्बन्धित मुद्दामा ओलीको पक्राउ सामान्य विषय हो र यसबाट ओली र उनका पार्टी सुरक्षित रहेका छन्।
उनले भने, “अन्ततः ओली गिरफ्तार भए, तर कुनै भ्रष्टाचार वा अन्य गम्भीर कारणले होइन। यसले उनको राजनीतिक जीवनलाई क्षति पुर्याएको छैन। भाद्र २३ र २४ को घटनामा उनी र उनको पार्टीमाथि जुन हमला भयो, त्यसको तुलना गर्दा यो गिरफ्तारी सामान्य हो।”
कट्टेलले नेपालमा भएको जेन–जी घटनालाई बंगलादेश मोडलसँग तुलना गर्दै शेख हसिनाको अवस्थासँग सम्झाए र ओलीले पाएको सजाय त्यसको तुलनामा हल्का भएको बताए।
उनले सामाजिक सञ्जालमा लेखे, “भाद्र घटनामा विद्रोह वा जनआन्दोलनको आवरणमा प्रायोजित हमला भएको थियो। त्यतिबेला ओलीलाई थुनिनु वा मारिनु सामान्य अवस्था थियो, तर दाहालका कारण भू–राजनीतिक कारणले त्यस्तो भएन। ओलीको लागि चुनाव हार्नु वा थुनिनु सामान्य विषय हो। शेख हसिनालाई मृत्युदण्ड दिइएको थियो र उनको पार्टी प्रतिबन्धित गरिएको थियो। यसर्थ ओली र उनका पार्टी सुरक्षित छन्।”
कट्टेलले यो अवस्थालाई अवसरको रूपमा पनि व्याख्या गर्दै भने, “ओलीका लागि यो ठूलो राजनीतिक अवसर हो। एमालेका लागि पनि यो मौका हो—सत्ता र दलालीको बाटो छोडेर जनता र राष्ट्रको पक्षमा उभिने र संघर्षको बाटोमा फर्किने अवसर।”
प्रकाशित मिति: १८ चैत्र २०८२, बुधबार
प्रतिक्रिया