सुर्खेत। सुर्खेतकी १६ वर्षीया इनिशा बिकको शव २७ दिनपछि परिवारले बुझ्ने भएको छ ।
आज उनको दाहसंस्कार गरिने भएको छ ।
गत फागुन २३ गते वीरेन्द्रनगरको सामुदायिक वनमा मृत अवस्थामा फेला परेकी इनिशाको शव सामूहिक बलात्कार र हत्या भएको भन्दै परिवारले सुरुमा बुझ्न अस्वीकार गरेका थिए ।
घटनामा संलग्न चारै आरोपितलाई प्रहरीले पक्राउ गरी अदालतले पुर्पक्षका लागि थुनामा राख्न आदेश दिएपछि मात्र परिवार शव बुझ्न सहमत भएका हुन् ।
इनिशाको २७ दिनपछि आज भेरी नदीको सम्झिघाटमा दाहसंस्कार गरिने परिवारले जनाएको छ ।
दुई साता लामो अनुसन्धानपछि प्रहरीले गत साता सरकारी वकिल कार्यालयमा अनुसन्धान प्रतिवेदन बुझाएको थियो ।
आइतबार सरकारी वकिल कार्यालयले सुर्खेत जिल्ला अदालतमा अभियोग पत्र दायर गरेको थियो ।
मंगलबार उक्त मुद्दामा थुनछेक बहस भएको थियो ।
सुर्खेत जिल्ला अदालतको बाल इजलासका न्यायाधीश दीपक ढकालको इजलासले आरोपित चारै जनालाई पुर्पक्षका लागि थुनामा राख्न आदेश दिएको छ ।
अदालतका सूचना अधिकारी उज्वल रावलका अनुसार घटनाको गम्भीरता र प्रारम्भिक प्रमाणका आधारमा अनुसन्धान पूरा नहुँदासम्म थुनामै राखेर मुद्दा अघि बढाउने निर्णय गरिएको हो ।
अदालतको आदेशअनुसार आरोपित चारै जनालाई बालसुधार गृहमा पठाइने भएको छ ।
सोमबारदेखि बाल इजलासमा सुनुवाई भइरहेको मुद्दामा मंगलबार थुनछेक बहसपछि यो आदेश जारी भएको हो ।
इनिशाको मृत्युपछि वीरेन्द्रनगरमा पीडित पक्ष र आरोपित पक्षबीच पटक-पटक प्रदर्शन हुँदै आएका थिए ।
शव बुझ्ने र दाहसंस्कार गर्ने निर्णयसँगै परिवारले न्यायका लागि निरन्तर लड्ने बताएका छन् ।
यो घटनाले सुर्खेतमा ठूलो आक्रोश र चासो उत्पन्न गरेको थियो ।
अब अदालतले मुद्दालाई कसरी अघि बढाउँछ भन्ने विषयमा स्थानीयवासीको ध्यान केन्द्रित भएको छ ।
प्रकाशित मिति: १९ चैत्र २०८२, बिहिबार
प्रतिक्रिया