काठमाडौं। नेपाली कांग्रेसका नेता डा. शेखर कोइरालाले भदौ २३ र २४ गते भएको जेनजी विद्रोह नेपाली माटोको अर्ग्यानिक आन्दोलन नभएको दाबी गरेका छन् ।
स्वर्गीय कमल कोइरालाको प्रथम स्मृति कार्यक्रममा बोल्दै डा. कोइरालाले उक्त घटनालाई आन्दोलन वा विद्रोह नभई बाह्य शक्तिको खेल भएको बताए ।
उनले भने, “म आफैं सो घटनालाई अर्ग्यानिक मान्न तयार छैन ।
मसँग यो जेनजी विद्रोह अर्ग्यानिक होइन भन्ने प्रशस्त प्रमाण छन् ।”
डा. शेखर कोइरालाले अबका दिन कांग्रेस र वामपन्थी शक्तिहरूका लागि निकै चुनौतीपूर्ण र जोखिमयुक्त रहेको चेतावनी दिए ।
उनले यस्तो बेला कांग्रेस र एमाले पार्टीभित्रै आफैंभित्र लडिरहेकोमा असन्तुष्टि जनाए ।
उनले भने, “अबका दिन कांग्रेस र कम्युनिस्टका लागि कठिन छन् ।
एमाले र कांग्रेस दुवै पार्टी विचित्रको अप्ठेरोमा फसेका छन् भन्ने कुरा स्वीकार गरौं ।”
डा. कोइरालाले थप भने, “कांग्रेस र एमाले मिलाएर अघि लैजान सकेनौं भने अवस्था के हुन्छ ?
अबको ५ वर्षपछि होस् वा स्थानीय निर्वाचन वा प्रदेश निर्वाचनमा होस्, त्यो बेला स्थिति के हुन्छ ?
म यो मञ्चबाट स्पष्ट भन्छु – कांग्रेस र एमाले एकढिक्का भएर लड्न सक्यौं भने अस्तित्व रहन्छ, होइन भने अप्ठेरो परिस्थितिमा जान्छौं । यसमा कुनै दुईमत छैन ।”
उनले कांग्रेस र वामपन्थी शक्तिहरूबीच एकता कायम नगरे अस्तित्व नै संकटमा पर्न सक्ने चेतावनी दिएका छन् ।
डा. शेखर कोइरालाको यो भनाइले नेपाली राजनीतिमा कांग्रेस र एमालेबीचको सम्बन्ध र भविष्यको चुनौतीबारे नयाँ बहस सुरु गरेको छ ।
प्रकाशित मिति: १९ चैत्र २०८२, बिहिबार
प्रतिक्रिया