हवाना। क्यारिबियन राष्ट्र क्युबाले आर्थिक संकट र बढ्दो अमेरिकी दबाबका कारण २ हजारभन्दा धेरै कैदीलाई रिहा गर्ने घोषणा गरेको छ ।
यो पछिल्ला वर्षहरूमा गरिएको सबैभन्दा ठूलो सामूहिक कैदी रिहाइमध्ये एक हो ।
सरकारी सञ्चारमाध्यम मार्फत सार्वजनिक गरिएको निर्णयअनुसार राम्रो आचरण, स्वास्थ्य अवस्था र अपराधको प्रकृतिका आधारमा माफी दिइएको छ ।
रिहा गरिनेमा युवा, महिला, ६० वर्षभन्दा माथिका वृद्ध तथा विदेशी कैदीहरू समेत समावेश छन् ।
तर हत्या, यौन हिंसा वा अन्य गम्भीर अपराधमा संलग्न कैदीहरूलाई भने यो सूचीमा समावेश गरिएको छैन ।
मानवअधिकार संस्था ह्यूमन राइट्स वाचका अनुसार क्युबामा राजनीतिक कार्यकर्ता, पत्रकार र विरोधीहरूलाई नियमित रूपमा हिरासतमा राख्ने गरिएको छ ।
यसअघि सन् २०२५ मा संयुक्त राज्य अमेरिका र भ्याटिकनसँगको वार्तापछि क्युबाले ५५३ कैदी रिहा गरेको थियो ।
त्यतिबेला अमेरिकी प्रशासनले केही प्रतिबन्ध खुकुलो पार्ने प्रतिबद्धता जनाएको थियो ।
तर डोनाल्ड ट्रम्पले पुनः सत्ता सम्हालेपछि उक्त सहमति रद्द भएकाले रिहाइ प्रक्रिया केही समय रोकिएको थियो ।
सरकारले यो निर्णयलाई इस्टरअघिको ‘पवित्र साता’ सँग जोडेको बताए पनि विश्लेषकहरूका अनुसार यसको मुख्य कारण बढ्दो आर्थिक संकट, ऊर्जा अभाव र अमेरिकी दबाब नै हो ।
हाल ट्रम्प प्रशासनले भेनेजुएलामार्फत हुने तेल आपूर्ति रोकेर तथा अन्य आर्थिक दबाब बढाएर क्युबामाथि कडा नीति अपनाएको छ, जसले क्युबाको अर्थतन्त्रलाई थप कमजोर बनाएको छ ।
यो सामूहिक (२ हजारभन्दा धेरै ) रिहाइले क्युबाको जेल व्यवस्थापन र आर्थिक दबाबबीचको सम्बन्धलाई उजागर गरेको छ ।
प्रकाशित मिति: २० चैत्र २०८२, शुक्रबार
प्रतिक्रिया