काठमाडौं । ललितपुरस्थित गोरखा सेभिङ्ग एण्ड क्रेडिटका अध्यक्षसहित चार जनालाई प्रहरीले पक्राउ गरेको छ। उपत्यका अपराध अनुसन्धान कार्यालयका एसपी मनोहर भट्टका अनुसार, ताल्चिखेलमा रहेको सहकारीका अध्यक्ष इमानसिंह राई, सीईओ लालबहादुर क्षेत्री, अविनकुमार राई र लेखा समिति सदस्य कर्णबहादुर राई पक्राउ परेका हुन्।
एसपी भट्टका अनुसार उनीहरूलाई चैत १८ गते उपत्यकाभरका विभिन्न स्थानबाट नियन्त्रणमा लिएर थप अनुसन्धानका लागि जिल्ला प्रहरी परिसर ललितपुर पठाइएको छ। ललितपुर प्रहरीले चार दिनको म्याद लिएर अनुसन्धान प्रक्रिया अघि बढाएको छ।
पक्राउ परेका आरोपीमाथि बचतकर्ताको करिब ४ अर्ब ५ करोड ६० लाख ६८ हजार रुपैयाँ अपचलन गरेको आरोप छ। उक्त सहकारीमा हाल १० हजार ५९८ जना बचतकर्ता रहेका छन्।
प्रहरीले आगामी दिनमा थप विवरण सार्वजनिक गर्ने तयारी गरिरहेको छ।
प्रकाशित मिति: २० चैत्र २०८२, शुक्रबार
प्रतिक्रिया