काठमाडौं। अर्थमन्त्री तथा रास्वपाका उपसभापति स्वर्णिम वाग्ले ले सभामुख पदका उम्मेदवार डोलप्रसाद अर्याल लाई समर्थन गर्दै उनको अनुभव र शालीनताले संसदको गरिमा उकास्ने विश्वास व्यक्त गरेका छन्।
सभामुख चयनको प्रस्तावमाथि बोल्दै वाग्लेले अर्याललाई ‘सह–योद्धा र मित्र’ का रूपमा चित्रण गर्दै उनको उम्मेदवारीले संसदमा परिपक्व राजनीतिक तथा व्यवस्थापकीय अनुभव भित्रिने बताए। उनले अर्यालसँग कार्यपालिका र व्यवस्थापिका दुवै तहको अनुभव रहेको उल्लेख गरे।
अर्यालका व्यक्तिगत गुणबारे चर्चा गर्दै वाग्लेले उत्कृष्ट व्यवस्थापन क्षमता, समन्वयकारी भूमिका र मध्यमवर्गीय संघर्षबाट खारिएको चेतनालाई विशेष रूपमा प्रशंसा गरे।
सभामुखको प्रमुख गुण तटस्थता हुनुपर्नेमा जोड दिँदै उनले अर्यालले दलीय प्रभावभन्दा माथि उठेर जिम्मेवारी निर्वाह गर्ने विश्वास व्यक्त गरे। साथै, विगतका सफल सभामुखहरूको उदाहरण दिँदै उनले नयाँ सभामुखले ती मानकहरू अनुसरण गर्नुपर्ने सुझाव दिए।
यस क्रममा उनले पूर्वसभामुख दमननाथ ढुंगाना को संसदलाई जीवन्त बनाउने भूमिका र सुवास नेम्वाङ को कानूनी दक्षता तथा समन्वयकारी क्षमताबाट सिक्नुपर्ने धारणा राखे।
स्वर्णिम वाग्ले ले रास्वपाले ‘जेन–जी’ आन्दोलनको मर्म बोकेको उल्लेख गर्दै अर्यालले आधुनिक पुस्ताका अपेक्षा र आकांक्षालाई मौलिक ढंगले सम्बोधन गर्ने विश्वास व्यक्त गरे।
प्रकाशित मिति: २२ चैत्र २०८२, आइतबार
प्रतिक्रिया