नयाँ दिल्ली। सात वर्षको लामो अन्तरालपछि पहिलो पटक भारतले इरानबाट कच्चा तेल खरिद गरेको छ ।
पश्चिम एशियामा जारी द्वन्द्वका कारण तेल आपूर्तिमा अवरोध आएपछि भारतीय रिफाइनरीहरूले इरानी तेल पनि वैकल्पिक स्रोतको रूपमा सुनिश्चित गरेका छन् ।
भारतीय तेल मन्त्रालयले सामाजिक सञ्जालमार्फत दिएको जानकारी अनुसार सन् २०१९ मे महिनापछि पहिलोपटक इरानबाट कच्चा तेल आयात गरिएको हो ।
त्यसबेला अमेरिकाको दबाबका कारण भारतले इरानी तेल खरिद बन्द गरेको थियो ।
अहिले पश्चिम एशियामा आपूर्ति अवरुद्ध भइरहेको बेला भारतीय रिफाइनरीहरूले आफूलाई आवश्यक कच्चा तेलको व्यवस्था मिलाएका छन् ।
मन्त्रालयले स्पष्ट गरेको छ कि इरानी तेल आयातमा कुनै भुक्तानी समस्या छैन ।
भारत विश्वको तेस्रो ठूलो तेल आयातकर्ता तथा उपभोक्ता देश हो । हाल भारतले ४० भन्दा बढी देशबाट तेल आयात गर्दै आएको छ ।
कम्पनीहरूलाई व्यापारिक आधारमा विभिन्न स्रोतबाट तेल किन्न पूर्ण स्वतन्त्रता छ ।
यसैबीच भारतले इरानबाट ४४ हजार मेट्रिक टन तरलीकृत पेट्रोलियम ग्यास (एलपीजी) पनि खरिद गरेको छ ।
उक्त ग्यास बोकेको जहाज बुधबार मैंगलोर बन्दरगाहमा पुगेको थियो र हाल इन्धन उतार्ने काम भइरहेको मन्त्रालयले जनाएको छ ।
अमेरिकाले गत महिना इरानी तेल तथा प्रशोधित इन्धनमाथिको प्रतिबन्ध अस्थायी रूपमा हटाएको थियो ।
भारतीय मन्त्रालयका अनुसार आगामी महिनाहरूका लागि आवश्यक कच्चा तेलको पूर्ण व्यवस्था भइसकेको छ ।
यो कदमले भारतले तेल आपूर्ति सुरक्षालाई थप मजबुत बनाउने प्रयास गरेको देखिन्छ ।
प्रकाशित मिति: २२ चैत्र २०८२, आइतबार
प्रतिक्रिया