काठमाडौं। नेकपा एमालेका अध्यक्ष तथा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको बन्दीप्रत्यक्षीकरण रिटको सुनुवाइ आज पनि हुने भएको छ ।
आजको सुनुवाइमा महान्यायाधिवक्ता कार्यालयका तर्फबाट सरकारी वकिलले बहस गर्ने छन् ।
आइतबार सर्वोच्च अदालतका न्यायाधीश विनोद शर्मा र न्यायाधीश सुनिलकुमार पोखरेलको इजलासमा रिट निवेदकका तर्फबाट कानुन व्यवसायीहरूको बहस सकिएको थियो ।
ओली र लेखकलाई प्रहरीले चैत १४ गते भदौ २३ र २४ गतेको जेनजी आन्दोलन दमनसम्बन्धी मुद्दामा अनुसन्धानका लागि पक्राउ गरेको थियो ।
अध्यक्ष ओलीकी पत्नी राधिका शाक्य र नेता लेखककी पत्नी यशोदा लेखकले उनीहरूलाई गैरकानुनी रूपमा थुनामा राखिएको भन्दै चैत १५ गते बन्दीप्रत्यक्षीकरण रिट दायर गरेका थिए ।
अदालतले यसअघि तीन दिनभित्र लिखित जवाफ पेश गर्न सरकार र सुरक्षा निकायलाई आदेश दिएको थियो ।
आज सरकारी वकिलको बहसपछि रिटमा के निर्णय हुन्छ भन्ने विषयमा चासो बढेको छ ।
प्रकाशित मिति: २३ चैत्र २०८२, सोमबार
प्रतिक्रिया