बुटवल । कपिलवस्तुमा एक जनप्रतिनिधिद्वारा ड्युटीमा खटिएका सशस्त्र प्रहरीमाथि हातपात भएको घटना सार्वजनिक भएको छ।
शुद्धोदन गाउँपालिकाका उपाध्यक्ष होम प्रकाश चौधरीले सशस्त्र प्रहरीका वरिष्ठ हवल्दार भीमबहादुर चौधरीमाथि कुटपिट गरेपछि प्रहरीले उनलाई नियन्त्रणमा लिएको हो।
जिल्ला प्रहरी कार्यालय कपिलवस्तुका प्रहरी उपरीक्षक सन्तोष आचार्यका अनुसार घटनापछि उपाध्यक्ष चौधरीलाई नियन्त्रणमा लिएर थप अनुसन्धान अघि बढाइएको छ। उनले घटनासम्बन्धी अन्य पक्षहरूको पनि विस्तृत छानबिन भइरहेको जानकारी दिए।
स्थानीयका अनुसार उपाध्यक्षका भाइले ल्याउँदै गरेको जेसीबीसम्बन्धी सामग्री शुद्धोदन गाउँपालिका–५ स्थित चेकपोस्टमा प्रहरीले रोकेको विषयलाई लिएर विवाद सुरु भएको थियो। सोही विवाद उत्कर्षमा पुग्दा उपाध्यक्ष चौधरीले ड्युटीमै रहेका सशस्त्र प्रहरीमाथि बर्दीमै हातपात गरेको आरोप छ।
घटना भएको स्थान सशस्त्र प्रहरीको नियमित जाँच चौकी (चेकपोस्ट) क्षेत्रभित्र पर्ने बताइएको छ।
प्रकाशित मिति: २३ चैत्र २०८२, सोमबार
प्रतिक्रिया