काठमाडौँ । गृहमन्त्री सुधन गुरुङले आगामी आर्थिक वर्ष २०८३/८४ को वार्षिक नीति तथा कार्यक्रमको तयारीसम्बन्धी छलफल सकेलगत्तै त्रिभुवन अन्तर्राष्ट्रिय विमानस्थल तथा विपद् व्यवस्थापनको तयारीको आकस्मिक अनुगमन गरेका छन्।
लगातार वर्षा भइरहेका बेला सोमबार राति करिब साढे १० बजे उनले सिनामंगलस्थित सशस्त्र प्रहरी बलको विपद् उद्धार गण नम्बर २० मा पुगेर स्थलगत निरीक्षण गरेका हुन्। उक्त अनुगमनमा नेपाल प्रहरी र सशस्त्र प्रहरी बलका दुवै महानिरीक्षक (आईजीपी) पनि सहभागी थिए।
वर्षायाम सुरु भएसँगै सम्भावित विपद् जोखिमलाई ध्यानमा राख्दै मन्त्री गुरुङले उद्धारका लागि आवश्यक उपकरण, जनशक्ति र पूर्वतयारीको अवस्थाबारे जानकारी लिए। नागरिकको जिउधनको सुरक्षाका लागि उपलब्ध स्रोत–साधन तयारी अवस्थामा राख्न उनले सुरक्षा निकायलाई निर्देशन दिएका छन्।
विपद्को बेला तुरुन्त परिचालन हुनुपर्ने उद्धार टोलीको मनोबल तथा भौतिक संरचनाको अवस्था बुझ्न आफू स्वयं फिल्डमा गएको उनले बताएका छन्। यसअघि उनले मन्त्रालयमा आगामी वर्षको बजेट तथा नीतिगत कार्यक्रमबारे गृह प्रशासनका उच्च अधिकारीहरूसँग दिनभर छलफल गरेका थिए।
प्रकाशित मिति: २४ चैत्र २०८२, मंगलबार
प्रतिक्रिया