काठमाडौं। शान्ति सुरक्षा र अपराध नियन्त्रणलाई थप प्रभावकारी बनाउन गृह मन्त्रालयले ‘सेन्ट्रल कमान्ड सिस्टम’ स्थापना गर्ने निर्णय गरेको छ ।
सोमबार मन्त्रालयको उच्च व्यवस्थापन समूहको बैठकले यो निर्णय गरेको हो ।
सेन्ट्रल कमान्ड सिस्टममार्फत देशभरका जिल्ला प्रशासन कार्यालय, जिल्ला प्रहरी कार्यालय र सशस्त्र प्रहरी बलका कार्यालयहरूसँग सिधा सम्पर्क कायम गरी सूचना आदानप्रदान र अनुगमन कार्यलाई तीव्रता दिइने छ ।
गृह मन्त्रालयका प्रवक्ता (सहसचिव) आनन्द काफ्लेले भने, “यो प्रणालीले सूचना आदानप्रदानलाई छिटो बनाउने र महत्वपूर्ण स्थानहरूको प्रत्यक्ष अनुगमन गर्न सहयोग पुग्नेछ ।”
गृहमन्त्री सुधन गुरुङले प्रणाली स्थापनाको काम तत्काल अघि बढाउन निर्देशन दिएका छन् ।
यसैगरी, सर्वसाधारणले दिएको उजुरी तथा जाहेरीको प्रगति विवरण अब सम्बन्धित व्यक्तिलाई फोन, एसएमएस र इमेलमार्फत उपलब्ध गराउने व्यवस्था गरिने भएको छ ।
नेपाल प्रहरीले मातहतका कार्यालयहरूलाई यससम्बन्धी निर्देशन दिइसकेको छ ।
गृहमन्त्री गुरुङले यसको साप्ताहिक प्रतिवेदन मन्त्रालयमा पेस गर्न र क्रमशः अन्य निकायमा पनि लागू गर्न निर्देशन दिएका छन् ।
बैठकले गृह मन्त्रालय र मातहतका निकायहरूमा जनगुनासो सुन्ने प्रणालीलाई थप प्रभावकारी बनाउने निर्णय पनि गरेको छ ।
यसका लागि सबै कार्यालयमा गुनासो व्यवस्थापन संयन्त्र सक्रिय बनाइने र मन्त्रालयमा कल सेन्टर स्थापना गरी जनताका गुनासो सम्बोधन गरिने भएको छ ।
यो प्रणाली लागू भएपछि सुरक्षा व्यवस्था, अपराध नियन्त्रण र सेवा प्रवाहमा उल्लेखनीय सुधार हुने अपेक्षा गरिएको छ ।
प्रकाशित मिति: २४ चैत्र २०८२, मंगलबार
प्रतिक्रिया