काठमाडौं । मंगलबार बसेको मन्त्रिपरिषद् बैठकले आर्थिक, पूर्वाधार तथा प्रशासनिक क्षेत्रसँग सम्बन्धित विभिन्न महत्वपूर्ण निर्णयहरू गरेको छ। बैठकपछि जानकारी दिँदै सङ्घीय मामिला तथा सामान्य प्रशासन मन्त्री प्रतिभा रावलले निर्णयहरूको विवरण सार्वजनिक गरिन्।
बैठकले अर्थ मन्त्रालयअन्तर्गत सञ्चालन हुने बृहत्तर लुम्बिनी क्षेत्र विकास परियोजनाका लागि विश्व बैंकबाट प्राप्त हुने ८५ मिलियन अमेरिकी डलर बराबरको सहुलियतपूर्ण ऋण स्वीकार गर्ने निर्णय गरेको छ।
पूर्वाधार विकासतर्फ, नागढुंगा सुरुङमार्गको पश्चिम खण्डअन्तर्गत पर्ने धुनिबेसी नगरपालिका र पासाङल्हामु राजमार्गको वेत्रावती–धुन्चे–स्याफ्रुबेसी सडक खण्डमा पर्ने उत्तरगया गाउँपालिकामा आवश्यक निजी जग्गा अधिग्रहण गर्न सरकारलाई स्वीकृति दिइएको छ।
यसैगरी, काठमाडौं–तराई मधेश द्रुतमार्ग निर्माणका लागि काठमाडौं, ललितपुर र मकवानपुरका विभिन्न वन क्षेत्रभित्रका कुल ४६.३९ हेक्टर जमिन प्रयोग गर्न तथा १८ हजार ८९८ वटा रुख कटान गर्न अनुमति प्रदान गरिएको छ।
प्रशासनिक पुनर्संरचनाअन्तर्गत ललितपुरको पुल्चोकस्थित जलस्रोत तथा ऊर्जा अनुसन्धान केन्द्रलाई गोदावरी स्थानान्तरण गरी सो भवनमा जल तथा ऊर्जा आयोगको सचिवालय सार्ने निर्णय पनि गरिएको मन्त्री रावलले जानकारी दिइन्।
संस्थागत नियुक्तितर्फ, सरकारले राष्ट्रिय योजना आयोगको उपाध्यक्षमा डा. गुणाकर भट्टलाई नियुक्त गरेको छ भने नेपाल राष्ट्र बैंकको रिक्त डेपुटी गभर्नर पदमा किरण पण्डितलाई जिम्मेवारी दिइएको छ। साथै, समस्याग्रस्त सहकारी व्यवस्थापन समितिका अध्यक्ष तथा सदस्यहरूको राजीनामा पनि स्वीकृत गरिएको छ।
इन्धन आपूर्ति र बढ्दो आर्थिक भारलाई सम्बोधन गर्न सरकारले विशेष नीतिगत निर्णयसमेत गरेको छ। पेट्रोल, डिजेल र मट्टितेलको आयातमा लाग्दै आएको भन्सार महसुल तथा पूर्वाधार विकास करमा ५० प्रतिशत छुट दिने निर्णय गरिएको मन्त्री रावलले बताइन्।
उनका अनुसार पछिल्लो १५ दिनमै करिब ११ अर्ब ७२ करोड रुपैयाँ घाटा व्यहोर्नुपरेको अवस्थामा इन्धन खपत घटाउने उपायहरू पनि अघि सारिएका छन्। जसअन्तर्गत आइतबार सार्वजनिक बिदा दिने, सवारी साधनमा जोर–बिजोर प्रणाली लागू गर्ने तथा विद्युतीय सवारी (ईभी) र इथानोलको प्रयोगलाई प्रोत्साहन गर्ने नीति अवलम्बन गरिनेछ।
सरकारका यी निर्णयहरूले आर्थिक दबाब न्यूनीकरणसँगै पूर्वाधार विकास र प्रशासनिक सुधारलाई सन्तुलित रूपमा अघि बढाउने प्रयास गरिएको संकेत गरेका छन्।
प्रकाशित मिति: २४ चैत्र २०८२, मंगलबार
प्रतिक्रिया