काठमाडौं। प्रधानमन्त्री वालेन्द्र शाहले “काम नगर्ने जोसुकै भए पनि पदमुक्त हुने” स्पष्ट सन्देश दिँदै सुशासन र शासकीय सुधारको नयाँ अध्याय सुरु गरेका छन् ।
‘परिवर्तन सम्भव छ’ भन्ने नाराका साथ सिंहदरबार प्रवेश गरेका प्रधानमन्त्री शाहले कार्यकालको सुरुवाती दिनमै कठोर निर्णय लिन थालेका छन् ।
यसै साता श्रम, रोजगार तथा सामाजिक सुरक्षा मन्त्री दीपक कुमार साहलाई पदमुक्त गर्ने निर्णयले राजनीतिक वृत्तमा ठूलो तरंग पैदा गरेको छ ।
प्रधानमन्त्री निकट स्रोतका अनुसार मन्त्री साहको कार्यसम्पादन सन्तोषजनक नभएको र मन्त्रालयको स्वार्थसँग बाझिने गतिविधि देखिएको भन्दै उनलाई हटाइएको हो ।
प्रधानमन्त्री शाहले मन्त्री तथा सचिवहरूसँग ‘कार्यसम्पादन सम्झौता’ गरेका थिए ।
तोकिएका लक्ष्य पूरा नभएमा पद त्याग गर्नुपर्ने सर्त राखिएको उक्त सम्झौताको पहिलो ‘एक्सन’ का रूपमा श्रममन्त्रीको बर्खास्तीलाई हेरिएको छ ।
वैदेशिक रोजगारीमा ठगी नियन्त्रण, श्रमिकका समस्या समाधान र मन्त्रालयको दैनिक कार्यमा देखिएको उदासीनताका कारण प्रधानमन्त्रीले कडा कदम चालेको बताइएको छ ।
प्रधानमन्त्री सचिवालयका एक सदस्यले भने, “हामीसँग समय खेर फाल्ने विलासिता छैन ।
हरेक घण्टा जनताको सेवामा समर्पित हुनुपर्छ भन्ने प्रधानमन्त्रीको स्पष्ट निर्देशन छ ।”
प्रधानमन्त्री शाहको सुशासन अभियानको अर्को महत्वपूर्ण पक्ष भनेको सरकारी कार्यालयमा हुने बिचौलियाको चलखेल अन्त्य गर्नु हो ।
यातायात, मालपोत, राहदानी जस्ता सेवा प्रवाह हुने विभागहरूमा डिजिटल प्रणालीमार्फत पारदर्शिता ल्याउन विशेष टोली परिचालन गरिएको छ ।
अख्तियार दुरुपयोग अनुसन्धान आयोगलाई राजनीतिक प्रभावबाट मुक्त राखेर पुराना भ्रष्टाचारका फाइलहरू पुनः खोल्ने काम पनि सुरु भएको छ ।
भदौ २३–२४ को जन आन्दोलन र फागुन २१ को निर्वाचनमा राष्ट्रिय स्वतन्त्र पार्टीको प्रचण्ड बहुमतपछि प्रधानमन्त्री बनेका शाहका अगाडि बेथिति र भ्रष्टाचारको जरा उखेल्ने ठूलो चुनौती छ ।
तर उनले चालेका प्रारम्भिक कदमहरूले सर्वसाधारणमा नयाँ आशा जगाएको छ ।
आगामी दिनमा ‘स्मार्ट गभर्नेन्स’ र कडा अनुशासनसहितको नीति तथा कार्यक्रम ल्याउने तयारीमा रहेका प्रधानमन्त्री शाहले श्रम मन्त्रालयको जिम्मेवारी अहिलेलाई आफैंसँग राखेर प्रत्यक्ष निगरानी गर्ने सन्देश दिएका छन् ।
यो ‘एक्सन’ ले सिंहदरबारमा एउटा स्पष्ट सन्देश दिएको छ — अब पद भनेको सुविधा भोग्ने ठाउँ होइन, नागरिकको सेवक बनेर नतिजा दिनुपर्ने परीक्षाको घडी हो ।
प्रकाशित मिति: २७ चैत्र २०८२, शुक्रबार
प्रतिक्रिया