काठमाडौं। अमेरिकी प्रथम महिला मेलानिया ट्रम्प ले यौन अपराधी जेफ्री एपस्टीनसँग आफ्नो कुनै पनि सम्बन्ध नरहेको दाबी गरेकी छन् ।
बिहीबार ह्वाइट हाउसको ग्रान्ड फोयरबाट झन्डै पाँच मिनेट लामो सम्बोधन गर्दै उनले भनिन्, “म र मेरो श्रीमान् डोनाल्ड ट्रम्प न्युयोर्क र पाम बिचका केही सामाजिक कार्यक्रमहरूमा एपस्टीनसँगै देखिए पनि उनी वा घिस्लेन म्याक्सवेलसँग मेरो कहिल्यै व्यक्तिगत मित्रता वा सम्बन्ध थिएन ।”
मेलानियाले सामाजिक सञ्जालमा वर्षौंदेखि आफ्नो नाम जोडेर फैलाइएका नक्कली तस्बिर र भ्रामक समाचारहरूलाई ‘राजनीतिक रूपमा प्रेरित’ भन्दै कडा आलोचना गरिन् । उनले आफू कहिल्यै एपस्टीनको निजी टापुमा नगएको, उनको विमानमा नचढेको र कुनै पनि कानुनी कागजात वा एफबीआईको बयानमा आफ्नो नाम नरहेको स्पष्ट पारिन् ।
उनले थप भनिन्, “म एपस्टीनकी पीडित होइन र उनले मलाई डोनाल्ड ट्रम्पसँग भेटाएका पनि होइनन् । हाम्रो भेट सन् १९९८ मा न्युयोर्कको एक पार्टीमा संयोगवश भएको थियो ।”
सम्बोधनको सबैभन्दा महत्वपूर्ण पक्ष भने उनले अमेरिकी संसद्लाई गरेको आह्वान थियो । प्रथम महिला मेलानिया ट्रम्प ले एपस्टीन प्रकरणका पीडित महिलाहरूलाई संसद्मा उपस्थित गराएर शपथसहित बयान दिने वातावरण बनाउन माग गरेकी छन् । उनले भनिन्, “हरेक महिलाले सार्वजनिक रूपमा आफ्नो कथा सुनाउन पाउनुपर्छ र ती बयानहरूलाई सधैँका लागि संसद्को रेकर्डमा राखिनुपर्छ, तब मात्र सत्य बाहिर आउनेछ ।”
यो पत्रकार सम्मेलन प्रशासनका लागि अप्रत्याशित थियो । इरानसँगको युद्ध र अन्य प्रमुख राजनीतिक मुद्दाहरूमा ध्यान केन्द्रित भइरहेका बेला मेलानियाको यो कदमले एपस्टीन प्रकरणलाई फेरि एक पटक चर्चामा ल्याइदिएको छ ।
सम्बोधन सकिएलगत्तै उनले कुनै पत्रकारको प्रश्नको जवाफ नदिई त्यहाँबाट बाहिरिएकी थिइन् । कतिपयले यसलाई आफ्नो छवि सुधार्ने प्रयासका रूपमा हेरेका छन् भने कतिपयले पीडितहरूलाई न्याय दिलाउने उनको साहसको प्रशंसा गरेका छन् ।
प्रकाशित मिति: २७ चैत्र २०८२, शुक्रबार
प्रतिक्रिया