काठमाडौं। हालै घोषणा गरिएको दुई हप्ताको युद्धविरामपछि मध्यपूर्वमा तनाव कम गर्न अमेरिका र इरानबीच उच्चस्तरीय शान्ति वार्ता हुन लागेको छ ।
दुवै देशका प्रतिनिधिमण्डल पाकिस्तानको राजधानी इस्लामाबाद पुग्ने भएका छन् ।
पाकिस्तानले यो महत्वपूर्ण वार्ताको सुरक्षा र बन्दोबस्तीका लागि व्यापक तयारी गरेको छ । पाकिस्तानी गृहमन्त्री मोहसिन नक्वीले विदेशी प्रतिनिधिहरूको पूर्ण सुरक्षा सुनिश्चित गर्न विस्तृत योजना बनाएको बताएका छन् ।
इस्लामाबाद र रावलपिंडीमा स्थानीय बिदा घोषणा गरिएको छ भने एक्सप्रेस हाइवेमा यातायात डाइभर्सन गरिएको छ ।
रेड जोनमा रहेको पाँचतारे सेरेना होटललाई प्रतिनिधिमण्डलका लागि मात्र आरक्षित गरिएको छ ।
शनिबार इस्लामाबादमा हुने यो शान्ति वार्ता मा इरानको तर्फबाट संसद् सभामुख मोहम्मद बाकर गालिबाफले प्रतिनिधिमण्डलको नेतृत्व गर्नेछन् भने अमेरिकी टोलीको नेतृत्व उपराष्ट्रपति जेडी भान्सले गर्ने छन् ।
अमेरिकी टोलीमा वरिष्ठ राजदूत स्टिभ विटकफ र जारेड कुशनर पनि सहभागी हुने छन् ।
यो वार्ता आयातोल्लाह अली खामेनीको मृत्युपछि भएको पहिलो उच्चस्तरीय बैठक हो ।
जारी द्वन्द्वमा हजारौं मानिस मारिएका छन्, विश्वको महत्वपूर्ण तेल मार्ग बन्द भएको छ र अन्तर्राष्ट्रिय ऊर्जा मूल्य अकासिएको छ ।
पाकिस्तानको मध्यस्थतामा दुई हप्ते युद्धविराममा सहमति भएको केही दिनमै यो बैठक बस्न लागेको हो ।
दुवै पक्षबीच युद्धविरामलाई स्थायी बनाउने र थप द्वन्द्व रोक्ने विषयमा छलफल हुने अपेक्षा गरिएको छ ।
वार्ताको तयारीले मध्यपूर्वमा शान्ति प्रक्रिया अघि बढ्ने आशा जगाएको छ ।
प्रकाशित मिति: २७ चैत्र २०८२, शुक्रबार
प्रतिक्रिया