काठमाडौं । वैदेशिक रोजगार विभाग, ताहाचल कार्यालयका नायब सुब्बा हेमबहादुर मस्राङ्गी घुससहित पक्राउ परेका छन्।
वैदेशिक रोजगारसम्बन्धी मुद्दा मिलाइदिने भन्दै सेवाग्राहीसँग घुस माग गरेको सूचनाका आधारमा अख्तियार दुरुपयोग अनुसन्धान आयोगले निगरानी गर्दै आएको थियो।
अनुसन्धानका क्रममा आयोगको टोलीले मस्राङ्गीलाई सेवाग्राहीबाट १५ हजार रुपैयाँ घुस लिएको अवस्थामा नियन्त्रणमा लिएको जनाएको छ।
त्यसपछि कार्यालय परिसरमा गरिएको खानतलासीमा थप नगदसमेत फेला परेको छ। शौचालयबाट १५ हजार रुपैयाँ र उनको साथबाट स्रोत नखुलेको ७७ हजार ६ सय रुपैयाँ बरामद भएको आयोगले जनाएको छ।
नगद र मोबाइल फोनसहित उनलाई नियन्त्रणमा लिएर थप अनुसन्धान भइरहेको आयोगले जनाएको छ।
प्रकाशित मिति: २७ चैत्र २०८२, शुक्रबार
प्रतिक्रिया