काठमाडौँ । काठमाडौँको बल्खुस्थित कुमारी क्लब नजिक गरिएको विशेष चेकिङका क्रममा लागुऔषध सेवन (लापसे) गरी सवारी चलाइरहेका दुई जना चालक ट्राफिक प्रहरीको नियन्त्रणमा परेका छन्। पक्राउ पर्नेमा एक यात्रुवाहक हाईस र अर्को ईभी माइक्रोबसका चालक रहेका छन्।
काठमाडौँ उपत्यका ट्राफिक प्रहरी कार्यालय, लागुऔषध नियन्त्रण ब्यूरो र ट्राफिक प्रहरी प्रभाग बल्खुको संयुक्त टोलीले शनिबार उक्त कारबाही गरेको हो। चेकजाँचका क्रममा नेपाल प्रहरी अस्पतालको प्राविधिक टोलीले उनीहरूले लागुऔषध सेवन गरेको पुष्टि गरेको थियो।
सार्वजनिक यातायात जस्तो संवेदनशील सवारीका चालकहरू नै नशामा सवारी चलाइरहेको भेटिएपछि प्रहरीले उनीहरूलाई तत्काल नियन्त्रणमा लिएको हो।
पक्राउ परेका दुवै जनालाई थप अनुसन्धान तथा कानुनी प्रक्रिया अघि बढाउन प्रहरी वृत्त कालिमाटी पठाइएको छ।
प्रकाशित मिति: २९ चैत्र २०८२, आइतबार
प्रतिक्रिया