काठमाडौं। नेपालको पहिलो आधुनिक सडक सुरुङमार्ग नागढुंगा–सिस्नेखोला सुरुङमार्ग सञ्चालनको अन्तिम तयारीमा पुगेको छ ।
देशको यातायात पूर्वाधारमा नयाँ युगको सुरुवात गर्ने अपेक्षा गरिएको यो परियोजना बहुआयामिक महत्वको मानिन्छ ।
यो सुरुङमार्गको औपचारिक शिलान्यास २०७६ कार्तिकमा तत्कालीन प्रधानमन्त्री केपी शर्मा ओलीले गरेका थिए ।
परियोजनाको सुरुवाती लागत करिब २२ अर्ब रुपैयाँ अनुमान गरिएको थियो ।
तर निर्माणका क्रममा भूगर्भीय समस्या, डिजाइन परिवर्तन र अन्य कारणले लागत बढ्दै २७ अर्ब रुपैयाँभन्दा माथि पुगेको छ ।
जापान सरकारको सहुलियत ऋण सहयोगमा जापानी कम्पनी हाजमा–आन्दो जेभीले निर्माणको जिम्मा पाएको थियो ।
प्रारम्भमा परियोजना ४२ महिनाभित्र अर्थात् २०७८/८० सम्म सम्पन्न गर्ने लक्ष्य राखिएको थियो ।
तर विभिन्न प्राविधिक तथा भौगोलिक समस्याका कारण समय लम्बिँदै २०८२ सम्म आइपुग्दा निर्माण कार्य सम्पन्न भएको छ ।
अहिले धादिङतर्फ पहिरो नियन्त्रण र टोल गेट निर्माणको काम भइरहेको छ ।
सुरुङमार्ग सञ्चालनको ठेक्का भने चिनियाँ संलग्न ज्वाइन्ट भेन्चर कम्पनी युक्सिन–एआरटीले पाएको छ ।
सडक विभागअन्तर्गतको परियोजना कार्यालयले यो ठेक्का पाँच वर्षका लागि युक्सिन–एआरटीलाई करसहित एक अर्ब १० करोड ४० लाख ३७ हजार रुपैयाँमा दिएको हो ।
भौतिक पूर्वाधार तथा यातायात मन्त्रालयले नागढुंगा सुरुङमार्गमा चल्ने सवारी साधनको शुल्क पनि सार्वजनिक गरिसकेको छ ।
मन्त्रिपरिषद्ले गत साउन २६ गते सडक बोर्ड ऐन, २०५८ को दफा ६ को उपदफा (१) अनुसार दस्तुर लिने निर्णय गरेको थियो ।
सोही आधारमा राजपत्रमा सूचना प्रकाशित गरी दर निर्धारण गरिएको हो ।
जसअनुसार कार, भ्यान, पिकअप, ट्याक्टर, माइक्रो बस र अन्य हलुका सवारी साधनले काठमाडौं प्रवेश गर्दा ६५ रुपैयाँ र बाहिरिँदा ६० रुपैयाँ तिर्नुपर्नेछ ।
मिनी बस र मिनी टिपर/ट्रकको प्रवेश शुल्क ११५ रुपैयाँ र बाहिरिँदा ८० रुपैयाँ तोकिएको छ ।
बस र ट्रक (सिंगल रियर एक्सल) ले प्रवेश गर्दा २६० रुपैयाँ र बाहिरिँदा २०० रुपैयाँ तिर्नुपर्नेछ ।
मल्टी एक्सल ट्रक र भारी उपकरणको हकमा प्रवेश गर्दा ६०० रुपैयाँ र बाहिरिँदा २५० रुपैयाँ शुल्क लाग्नेछ ।
नागढुंगा सुरुङमार्ग सञ्चालनमा आउन लागेसँगै काठमाडौं–धादिङ यात्रा छोट्टिनुका साथै ट्राफिक जाम घट्ने, यात्रा समय बचत हुने र सडक दुर्घटना कम हुने अपेक्षा गरिएको छ ।
यो परियोजना पूरा भएपछि नेपालको यातायात क्षेत्रमा महत्वपूर्ण उपलब्धि मानिनेछ ।
प्रकाशित मिति: २९ चैत्र २०८२, आइतबार
प्रतिक्रिया