काठमाडौं — सिन्धुपाल्चोकको बाह्रबिसे नगरपालिकाका मेयर बालकृष्ण बस्नेतले अख्तियार दुरुपयोग अनुसन्धान आयोगमा काजमा कार्यरत एक कर्मचारीको तलब रोक्ने चेतावनी दिँदै पत्राचार गरेका छन्।
मेयर बस्नेतले अख्तियारमा काजमा रहेकी बाह्रबिसे नगरपालिकाकी पाँचौँ तहकी कर्मचारी अम्बिका दाहाल ओझालाई बिहीबार पत्र लेख्दै सात दिनभित्र नगरपालिकामा फर्कन निर्देशन दिएका छन्। पत्रमा यदि उनले तोकिएको समयभित्र हाजिरी नबुझाएमा तलब-भत्ता रोकिने उल्लेख गरिएको छ।
यस घटनालाई संवेदनशील बनाउने अर्को पक्ष के छ भने, सोही दिन अख्तियारले सांसद मोहनबहादुर बस्नेतविरुद्ध टेरामक्स खरिदसम्बन्धी भ्रष्टाचार मुद्दा दायर गरेको थियो। सांसद बस्नेत मेयर बस्नेतका दाइ (ठूलोबुबाका छोरा) हुन्। स्रोतका अनुसार, सोही मुद्दाको प्रतिक्रियामा मेयर बस्नेतले उक्त पत्र लेखेका हुन्।
कानुनअनुसार, स्थानीय तहका प्रमुखले अन्य कार्यालयमा काजमा खटिएका कर्मचारीलाई फिर्ता बोलाउने अधिकार राख्दैनन्। संघीय मामिला तथा सामान्य प्रशासन मन्त्रालयमार्फत मात्र यस्ता प्रक्रिया सम्भव हुन्छन्।
पत्रमा भनिएको छ, “एक वर्षमा तीन महिनाभन्दा बढी काज खटाउन नमिल्ने प्रावधानअनुसार सात दिनभित्र काज फिर्ता भई नगरपालिकामा हाजिर हुनूहोस्, अन्यथा तलब–भत्ता रोकिनेछ।”
कानुनी अधिकारभन्दा बाहिर गएर गरिएको पत्राचार, त्यो पनि आफ्नै नातेदारविरुद्ध भ्रष्टाचार मुद्दा दायर भएपछि भएको क्रियाकलाप भएकाले यसमा व्यक्तिगत प्रतिशोधको आशंका उठाइएको छ। स्रोतहरूका अनुसार, यस किसिमको कार्यले अख्तियारको पनि दुरुपयोग ठहर्न सक्नेछ।
प्रकाशित मिति: २ जेष्ठ २०८२, शुक्रबार
प्रतिक्रिया