काठमाडौं । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाहीले ‘भिजिट भिसा’ दुरुपयोग प्रकरणमा संलग्न व्यक्तिहरूलाई कडा कारबाहीको माग गर्दै तिनीहरूका समर्थकहरूलाई पनि सामाजिक बहिष्कार गर्न आम नागरिकलाई आग्रह गरेका छन्।
शाहीले शनिबार संसद् भवन परिसरमा सञ्चारकर्मीहरूसँग कुरा गर्दै भने, “हामी संसदभित्रबाट दोषीहरूको बहिष्कार गरिरहेका छौं, अब तपाईंहरूले चिया पसल, होटल, विवाह समारोहजस्ता सामाजिक ठाउँहरूमा पनि उनीहरूलाई बहिष्कार गर्नुपर्छ। यसरी सामाजिक रूपमा एक्ल्याइँदा उनीहरू र तिनका समर्थकहरूलाई गलत कार्यको मूल्य चुकाउनु पर्नेछ।”
उनले भिजिट भिसाको नाममा गरिएको ठगीले देशको अन्तर्राष्ट्रिय छवि धुमिल बनेको र यसले नेपाली युवाहरूलाई विदेशी भूमिमा अलपत्र पार्ने अवस्था सिर्जना गरेको उल्लेख गरे। “यो केवल कानुनी वा राजनीतिक मुद्दा मात्र होइन, राष्ट्रिय स्वाभिमान र युवाहरूको भविष्यसँग जोडिएको विषय हो,” उनले जोड दिए।
शाहीले दोषीहरू उम्किने हो भने यस्ता कार्य फेरि पनि दोहोरिने निश्चित रहेको उल्लेख गर्दै सरकारलाई कठोर कदम चाल्न चेतावनी दिए। “हामी संसदमा मात्र होइन, सडकमा पनि यसविरुद्ध आवाज उठाइरहनेछौं। जबसम्म दोषीहरूलाई कानुनी दायरामा ल्याइँदैन, हाम्रो संघर्ष जारी रहनेछ,” शाहीले दृढता व्यक्त गरे।
उनको भनाइमा, सांसदको हैसियतले आफूहरूले संस्थागत तहमा दबाब दिइरहेका छन्, तर नागरिक स्तरबाट पनि एकजुट दबाब आवश्यक छ। “यस्तो खालको सामाजिक सजगता र बहिष्कार नै दीर्घकालीन समाधानको बाटो हो,” उनले निष्कर्ष सुनाए।
प्रकाशित मिति: १४ असार २०८२, शनिबार
प्रतिक्रिया