काठमाडौं । जनता समाजवादी पार्टी (जसपा) का नेता अशोक यादवले मधेस कुनै न कुनै दिन नेपालबाट अलग हुने दाबी गरेका छन्। पक्राउ पूर्जी जारी भएसँगै फरार रहेका यादवले एक भिडियो सन्देशमार्फत यस्तो विवादास्पद अभिव्यक्ति दिएका हुन्।
‘जय बिहार, जय नेपाल, जय भारत’ भन्दै सुरु गरिएको भिडियो सन्देशमा यादवले भारतका प्रहरी अधिकारीहरूलाई नेपाल प्रहरीको अनुरोधमा आफूलाई नपक्रन आग्रह गरेका छन्। उनले आफू मधेस र भारतको पक्षमा “निष्ठाको लडाइँ” लडिरहेको दाबी गरे।
“मधेस आज नभए पनि भोलि नेपालबाट अलग हुन्छ — म रहूँ वा नरहूँ,” उनले भने।
आफूलाई मर्न डर नभएको भन्दै यादवले सर्लाहीका तत्कालीन प्रहरी प्रमुख (एसपी) योगेन्द्र खड्कासँगको टेलिफोन वार्ताका कारण मुद्दा लागेर आफूमाथि अन्याय भएको दाबी गरे। उनले एसपी र डीएसपीले आफू र आफन्तमाथि गुण्डागर्दी शैलीमा छापा मारेको आरोप पनि लगाए।
भिडियोमा यादवले मधेसी समुदायमाथि नेपालमा नस्लीय विभेद भइरहेको आरोप लगाउँदै भने, “नेपालका शासकहरूमा गहिरो खसवादी सोच रहँदै आएको छ। मधेसीहरूलाई दोस्रो दर्जाका नागरिकझैं व्यवहार गरिन्छ।”
यादवले बिहारका प्रहरी प्रमुख (एसपी) र सुरक्षा अधिकारीहरूलाई अपिल गर्दै भने, “बिहारका छोरीहरूको नेपालमा विवाह भए पनि उनीहरूका बच्चालाई नागरिकता नदिने चलनको विरोध गर्दै म लडिरहेको छु। कृपया नेपाल प्रहरीको अनुरोधमा कुनै कठोर कदम नचाल्नुस्।”
उनको यस्तो अभिव्यक्तिपछि सामाजिक तथा राजनीतिक वृत्तमा तीव्र प्रतिक्रिया र बहस सुरु भएको छ। कानुनविद्हरूले राष्ट्रको एकता र सामाजिक सद्भावविरुद्ध उत्तेजक अभिव्यक्ति दिएको भन्दै यादवलाई कानुनी कारबाहीको दायरामा ल्याइनु पर्ने धारणा राखेका छन्।
प्रकाशित मिति: २३ असार २०८२, सोमबार
प्रतिक्रिया