काठमाडौँ । पूर्वराष्ट्रपति विद्यादेवी भण्डारी र नेपाली कांग्रेसका वरिष्ठ नेता डा. शेखर कोइरालाबीच शुक्रबार बिहान भेटवार्ता भएको छ।
पूर्वराष्ट्रपति भण्डारीको बुढानीलकण्ठस्थित निवासमा भएको करिब एक घण्टाको भेटमा समसामयिक राजनीतिक विषयहरूमा विस्तृत छलफल भएको कोइरालाका स्वकीय सचिव दिनेशचन्द्र थपलियाले जानकारी दिए।
भेटका क्रममा डा. कोइरालाले आफू भ्रष्टाचारविरुद्ध निरन्तर आवाज उठाउँदै आएको र सुशासनको पक्षमा प्रतिबद्ध रहेको बताए। उनले पूर्वराष्ट्रपति भण्डारीलाई पनि उक्त अभियानमा साथ दिन आग्रह गरेका थिए। कोइरालाको भनाइमा हालको सरकारले अपेक्षित रूपमा भ्रष्टाचार नियन्त्रण गर्न नसकेको उल्लेख गरिएको थियो।
यस क्रममा पूर्वराष्ट्रपति भण्डारीले आफू सुशासन समर्थक प्रयासमा साथ दिन तयार रहेको प्रतिक्रिया दिएकी थिइन्। साथै, अब सक्रिय राजनीतिमा फर्किन लागेको उल्लेख गर्दै उनले डा. कोइरालासँग सहयोग र समर्थन पनि मागेकी थिइन्।
भेटका क्रममा समसामयिक राजनीतिक अवस्था, सुशासन र भावी राजनीतिक भूमिकाका विषयमा गहन छलफल भएको स्रोतको दाबी छ।
प्रकाशित मिति: २ श्रावण २०८२, शुक्रबार
प्रतिक्रिया