कोलकाता । पश्चिम बंगालमा ‘सामूहिक विद्रोह’को आह्वान गरेको आरोपमा भारतीय जनता पार्टी (भाजपा) का पूर्वसांसद अर्जुन सिंहविरुद्ध १४ वटा एफआईआर दर्ता भएको छ। नेपालमा राजनीतिक अस्थिरता भएको विषयलाई जोड्दै दिएको विवादास्पद अभिव्यक्तिका कारण सिंहप्रति आफ्नै पार्टीका नेताहरूले समेत दूरी बनाएका छन्।
सिंहले बुधबार पश्चिम बंगालका युवाहरूलाई भ्रष्ट सरकारलाई हटाउन उठ्ने आग्रह गर्दै नेपालसँग समानान्तरता जोड्ने टिप्पणी गरेका थिए। उनले भनेका थिए, ‘पश्चिम बंगालका युवाहरूले भ्रष्ट सरकार हटाउन कहिले उठ्छन्? रक्तपातबिना कुनै भ्रष्ट शासनको अन्त्य हुँदैन। बेरोजगार युवाहरूले नेपालबाट सिक्नुपर्छ। जब बंगालका युवाहरू उठ्छन्, यदि मलाई बोलाए भने म अगाडि बढेर नेतृत्व गर्न तयार छु।’
बाराकपुर प्रहरी प्रमुख मुरलीधर शर्माले सिंहविरुद्ध १४ वटा एफआईआर दर्ता भएको र अनुसन्धान भइरहेको पुष्टि गरेका छन्। सिंहले भने, ‘म फेरि दोहोर्याउँछु, बङ्गालमा भ्रष्ट सरकारलाई हटाउन सामूहिक विद्रोह आवश्यक छ। पहिले १८४ वटा एफआईआर थिए, अब ४०० भए पनि स्वागत गर्छु।’
यस विषयमा भाजपाले आफूलाई अलग राखेको छ। विधानसभाका प्रमुख सचेतक शङ्कर घोषले भने, ‘हामी निर्वाचित प्रतिनिधिहरूको हैसियतमा छिमेकी देशको राजनीतिक घटनाक्रममा टिप्पणी गर्दैनौँ। यी संवेदनशील विषय हुन्।’
भाजपाका प्रदेश अध्यक्ष सामिक भट्टाचार्यले पनि नेपालको घटनाक्रममा टिप्पणी नगर्ने बताए र ‘सामूहिक विद्रोह’को सट्टा ‘सामूहिक जागरूकता’मा ध्यान दिनुपर्ने जोड दिए।
उता, तृणमूल कांग्रेस (टीएमसी) का बाराकपुर सांसद पार्थ भौमिकले सिंहमाथि मुख्यमन्त्री ममता बनर्जीको हत्याको षड्यन्त्र गर्ने आरोप लगाउँदै उनका गतिविधि हिंसाको प्रत्यक्ष उक्साहट भएको बताएका छन्।
प्रकाशित मिति: २७ भाद्र २०८२, शुक्रबार
प्रतिक्रिया