काठमाडौं । वैदेशिक रोजगार विभागले यस वर्षको दशैं बिदामा समेत श्रम स्वीकृति प्रदान गर्ने भएको छ । विभागका महानिर्देशक कमल भट्टराईका अनुसार आवश्यक व्यवस्थापन गर्दै छुट्टै टोली तोकिएको छ ।
उनका अनुसार एक जना उपसचिवसहित सात जना कर्मचारीलाई डेडिकेटेड रूपमा खटाइनेछ । ती कर्मचारीहरूले दशैं बिदाको समयमा श्रम स्वीकृति अनिवार्य रूपमा दिनुपर्ने अवस्थालाई सम्बोधन गर्नेछन् ।
विशेषगरी वैदेशिक रोजगारीका लागि भिसा प्राप्त गरेर हवाई टिकटसमेत काटिसकेका कामदारलाई समयमै पठाउनुपर्ने भएकाले यस्तो व्यवस्था गरिएको विभागले जनाएको छ । श्रम स्वीकृति लिन चाहनेले अनलाइन प्रणालीमार्फत आवश्यक कागजातसहित आवेदन पेश गर्नुपर्नेछ । कागजात अपूर्ण भएमा आवेदन अस्वीकृत हुने र अस्वीकृतिको कारणसमेत स्पष्ट रूपमा बताइने व्यवस्था गरिएको छ ।
यसैबीच, वैदेशिक रोजगारीको प्रमुख गन्तव्य रहेका कतिपय मुलुकहरूले पछिल्ला दिनमा वर्किङ भिसामा कडाइ गरेका छन् । संयुक्त अरब इमिरेट्स (यूएई) ले भिजिट भिसामा रोक लगाएको छ भने मलेसिया लगायतका अन्य मुलुकहरूले पनि वर्किङ भिसा कडाइ गर्दै आएका छन् ।
गत भदौ २३ र २४ गते नेपालमा भएको जेनजी आन्दोलनका क्रममा कैदीबन्दी भाग्ने घटना भएपछि ती मुलुकहरूले सुरक्षा कारण देखाउँदै यस्तो कडाइ गरेका हुन् ।
प्रकाशित मिति: १४ आश्विन २०८२, मंगलबार
प्रतिक्रिया