काठमाडौं । राष्ट्रिय स्वतन्त्र पार्टी (रास्वपा)ले आगामी फागुन २१ गतेका लागि तोकिएको प्रतिनिधि सभा निर्वाचनको कार्यतालिका सार्वजनिक गर्नुअघि निर्वाचन आयोगले राजनीतिक दलहरूसँग कुनै छलफल नगरेको भन्दै प्रश्न उठाएको छ ।
बुधबार बसेको पार्टी सचिवालय बैठकपछि महामन्त्री कविन्द्र बुर्लाकोटीले आयोगले दलहरूसँग परामर्श नगरी कार्यतालिका सार्वजनिक गरेको विषय बैठकमा गम्भीर रूपमा उठेको जानकारी दिए ।
‘निर्वाचन आयोगले कार्यतालिका सार्वजनिक गर्नु अघि राजनीतिक दलहरूसँग छलफल र परामर्श गर्नुपर्थ्यो भन्ने कुरा सचिवालय बैठकमा उठेको छ,’ बुर्लाकोटीले भने, ‘यस विषयमा हामी पार्टीभित्र थप छलफल गरिरहेका छौं ।’
उनका अनुसार रास्वपाको अर्को सचिवालय बैठक शुक्रबार बस्नेछ, जसमा आयोगको कार्यशैली र आगामी निर्वाचनबारे पार्टीको आधिकारिक धारणा तय गरिनेछ ।
बुर्लाकोटीले दलहरूसँग संवाद र सहमति गर्दै अघि बढ्दा चुनावी वातावरण सहज र सकारात्मक बन्ने भन्दै सरकार र आयोगलाई समन्वयात्मक भूमिका निभाउन आग्रह गरे ।
बुधबारको बैठकमा भदौ २३ र २४ गतेका राजनीतिक घटनाक्रमपछि देखिएको अन्यौलता अन्त्य गर्न र राष्ट्रिय एकता सुदृढ बनाउन ‘सद्भाव यात्रा’ सुरु गर्ने तयारीबारे पनि छलफल भएको उनले बताए । उक्त यात्राबारे अन्तिम निर्णय शुक्रबारको बैठकबाट हुनेछ ।
त्यसैगरी उनले पार्टीको कात्तिक १४ र १५ गते हुने विस्तारित बैठकका एजेन्डा तय गर्ने जिम्मेवारी पनि यही सचिवालय बैठकले लिएको जानकारी दिए ।
प्रकाशित मिति: २३ आश्विन २०८२, बिहिबार
प्रतिक्रिया