काठमाडौं । टोखामा फलामको रड प्रहारबाट गम्भीर घाइते भएका एक युवकको उपचारका क्रममा मृत्यु भएको छ ।
टोखा नगरपालिका–२ चण्डेश्वरीमा बस्ने पाँचथर घर भएका ४० वर्षीय राम लिम्बूको मृत्यु भएको महानगरीय प्रहरी परिसर काठमाडौंले जनाएको छ ।
प्रहरीका अनुसार सोही स्थानमा बसोबास गर्दै आएका उदयपुर घर भएका २७ वर्षीय गणेश लामा र सिन्धुलीका ४० वर्षीय खुपबहादुर तामाङसँग विवाद भएपछि लिम्बूमाथि फलामको रड प्रहार गरिएको थियो ।
गम्भीर घाइते भएका लिम्बूलाई उपचारका लागि ट्रमा सेन्टर लगिएको थियो, तर शुक्रबार बिहान उपचारकै क्रममा उनको मृत्यु भएको प्रहरीले जनाएको छ ।
घटनापछि प्रहरीले गणेश र खुपबहादुरलाई नियन्त्रणमा लिएको छ । विवादको कारणबारे हाल अनुसन्धान भइरहेको प्रहरीले जानकारी दिएको छ ।
प्रकाशित मिति: २४ आश्विन २०८२, शुक्रबार
प्रतिक्रिया