काठमाडौं । नेकपा (एमाले)को सचिवालय बैठक अध्यक्ष केपी शर्मा ओली अस्वस्थ भएपछि स्थगित भएको छ। शनिबारका लागि तय गरिएको बैठक अब आइतबार बिहान ११ बजे बस्ने भएको एमाले केन्द्रीय कार्यालयका सचिव भिष्म अधिकारीले जानकारी दिएका छन्।
उनका अनुसार अध्यक्ष ओलीलाई रुघा–खोकीको समस्या देखिएपछि बैठक सारिएको हो।
शुक्रबार बसेको सचिवालय बैठकमा पार्टीको आसन्न महाधिवेशनबारे प्रारम्भिक छलफल भएको थियो। सो बैठकले महाधिवेशनमार्फत पार्टीभित्र उठेका प्रश्नहरूको उत्तर खोज्दै नयाँ ऊर्जा र दिशासहित अघि बढ्ने निष्कर्ष निकालेको थियो।
त्यसैगरी बैठकमा भदौ २३ र २४ गते भएको जेन–जी आन्दोलनका कारण उत्पन्न राजनीतिक परिस्थिति र त्यसको प्रभावबारे पनि विस्तृत समीक्षा गरिएको थियो। बैठकले राष्ट्रिय एकता मजबुत बनाउन, कुनै दललाई निषेध नगरी सहकार्य र सहअस्तित्वको भावनासहित अघि बढ्नुपर्ने निष्कर्ष निकालेको थियो।
प्रकाशित मिति: २५ आश्विन २०८२, शनिबार
प्रतिक्रिया