एजेन्सी । अमेरिकी गुप्तचर संस्था सीआईएले रुसी राष्ट्रपति भ्लादिमिर पुटिनको निवासमाथि युक्रेनले कुनै ड्रोन आक्रमण नगरेको निष्कर्ष निकालेको छ। अमेरिकी अधिकारीहरूले जानकारी दिएका अनुसार सीआईएको निर्देशक जोन र्याटक्लिफले बुधबार राष्ट्रपति डोनाल्ड ट्रम्पलाई यसबारे जानकारी गराएका थिए।
यसअघि सोमबार पुटिनले ट्रम्पसँग टेलिफोन वार्तामा युक्रेनले आफ्नो निवासमाथि हमला गर्न खोजेको दाबी गरेका थिए। तर सीआईएको प्रतिवेदनले पुटिनको उक्त दाबी गलत रहेको पुष्टि गरेको छ। रुसी अधिकारीहरूले पुटिनको घरमा युक्रेनले ड्रोन आक्रमण गरेको सार्वजनिक रूपमा आरोप लगाएपछि ट्रम्पले सञ्चारकर्मीहरूसँग पुटिनले आफूलाई जानकारी दिएको बताएका थिए।
त्यतिबेला ट्रम्पले युक्रेनको कडा खण्डनका बाबजुद पुटिनको दाबीमा विश्वास व्यक्त गर्दै घटनाप्रति आफ्नो रिस व्यक्त गरेका थिए। उनले भनेका थिए, ‘मलाई यो मन परेन, यो राम्रो होइन।’ तर उनले पुटिनको दाबी झुटो हुन सक्ने सम्भावनालाई पूर्ण रूपमा नकारेनन्।
सीआईएको ब्रिफिङपछि ट्रम्पको अडानमा परिवर्तन देखिएको छ। बुधबार उनले आफ्नो सामाजिक सञ्जाल ‘ट्रुथ सोसल’ मार्फत न्युयोर्क पोस्टको सम्पादकीय लिङ्क साझा गर्दै रुसी दाबीप्रति शंका व्यक्त गरेका छन्। उक्त सम्पादकीयले पुटिनले झुटो दाबी गरेर शान्तिको बाटोमा अवरोध खडा गरेको र युक्रेनमाथि विगत चार वर्षदेखि जारी क्रूर युद्धमा आफ्नो पक्षमा हिंसा भएको भन्दै आक्रोश पोख्नु अर्थहीन भएको उल्लेख गरेको छ।
सम्पादकीयले यो पनि उल्लेख गरेको छ कि युक्रेनी राष्ट्रपति भोलोडिमिर जेलेन्स्कीले आक्रमणको कुरा ठाडै अस्वीकार गरेका छन् भने क्रेमलिनका प्रवक्ता दिमित्री पेस्कोभले पनि यसको कुनै प्रमाण पेश गर्न सकेका छैनन्।
ह्वाइट हाउसले यस विषयमा थप टिप्पणी गर्न बाँकी राखेको छ भने सीआईएले पनि औपचारिक प्रतिक्रिया दिन अस्वीकार गरेको छ।
प्रकाशित मिति: १७ पुस २०८२, बिहिबार
प्रतिक्रिया