काठमाडाैं । उत्तरी गोरखाबाट मतपेटिका बोकेर उडेको नेपाली सेनाको हेलिकप्टर खराब मौसमका कारण गोरखा सदरमुकाममा अवतरण गर्न नसकेपछि पोखरामा आकस्मिक अवतरण गरेको छ।
जिल्ला प्रहरी कार्यालय गोरखाका अनुसार हेलिकप्टरमा चुमनुब्री गाउँपालिका–१ स्थित गौरिशंकर आधारभूत विद्यालय, खाङसार र साम्दो आधारभूत विद्यालय मतदान केन्द्रका मतपेटिका राखिएका थिए।
डीएसपी राजकुमार श्रेष्ठका अनुसार उत्तरी गोरखामा रहेका २३ मतदान केन्द्रमध्ये पहिलो चरणमा ७ मतदान केन्द्रका मतपेटिका सुरक्षित रूपमा ल्याइएको थियो। तर दोस्रो चरणका मतपेटिका लिएर आउँदा खराब मौसमका कारण गोरखा सदरमुकाममा अवतरण सम्भव नभएपछि हेलिकप्टर पोखरा अवतरण गर्नुपरेको हो।
प्रहरीले मौसम अनुकूल भएपछि मतपेटिका गोरखा ल्याइने जनाएको छ।
प्रकाशित मिति: २२ फाल्गुन २०८२, शुक्रबार
प्रतिक्रिया