काठमाडौं। परराष्ट्रमन्त्री बालानन्द शर्माले मध्यपूर्व तथा अन्य अन्तर्राष्ट्रिय द्वन्द्वग्रस्त क्षेत्रमा रहेका नेपाली नागरिकको सुरक्षाप्रति सरकार पूर्ण रूपमा संवेदनशील रहेको बताएका छन् ।
गैरआवासीय नेपाली सङ्घको १२औँ विश्व सम्मेलनको आज यहाँ शुभारम्भ गर्दै उनले प्रवासमा हासिल गरेको ज्ञान, सीप र अनुभवलाई मातृभूमिको आर्थिक तथा
सामाजिक विकासमा उपयोग गर्नुपर्नेमा जोड दिए ।
प्रवासी नेपालीलाई मुलुकको विकासमा साझेदार बन्न आह्वान गर्दै उनले प्रविधिको तीव्र विकास र
अन्तर्राष्ट्रिय शक्ति सन्तुलनमा आएको फेरबदलका कारण नेपालको भूराजनीतिक सम्बन्ध र सौम्य शक्ति वृद्धिमा सङ्घले महत्वपूर्ण सेतुको काम गर्नुपर्ने बताए ।
उनले गैरआवासीय नेपालीलाई नेपालको सांस्कृतिक दूतका रूपमा प्रस्तुत गर्दै पारस्परिक विश्वास बढाउन र नेपाली माटोमा योगदान पु¥याउन आग्रह गरे ।
साथै, सङ्घको संरक्षण तथा प्रवर्द्धनका लागि सरकारले आवश्यक ऐनमा परिमार्जन गर्ने जानकारी पनि दिए ।
फरक प्रसङ्गमा उनले अन्तर्राष्ट्रिय द्वन्द्वका कारण प्रवासमा रहेका नेपालीको सुरक्षाप्रति सरकार संवेदनशील रहेको दोहोर्याए ।
आपत्कालीन अवस्थामा नेपाली नागरिकको उद्धार तथा सहयोगका लागि परराष्ट्र मन्त्रालय र
सम्बन्धित मुलुकस्थित नेपाली नियोगमार्फत उद्धार उडान सञ्चालन गरिएको पनि उनले जानकारी दिए ।
सङ्घका कार्यकारी अध्यक्ष बद्री केसीले नेपालमा लगानी भित्र्याउनेतर्फ आफूहरू क्रियाशील रहेको बताउँदै गैरआवासीय नेपालीको अधिकार संरक्षण गर्न संस्था प्रतिबद्ध रहेको दोहोर्याए ।
सम्मेलनमा प्रवासी नेपालीहरूको योगदान, लगानी, सीप तथा प्रविधि हस्तान्तरण, नेपालको पर्यटन तथा
संस्कृतिको प्रवर्द्धनजस्ता विषयमा छलफल हुने कार्यक्रम रहेको छ ।
प्रकाशित मिति: ३० फाल्गुन २०८२, शनिबार
प्रतिक्रिया