काठमाडौं। इरानले अमेरिकामाथि पूर्ण रूपमा विश्वास गुमाएको बताएको छ।
इरानी विदेशमन्त्री अब्बास अराघचीले अमेरिकासँगको विगतको अनुभव निकै कमजोर रहेको उल्लेख गर्दै अब अमेरिकामाथि कुनै पनि विश्वास गर्न नसकिने स्पष्ट पारेका छन्।
उनले २०१५ को आणविक सम्झौतालाई उदाहरण दिँदै भने, “अमेरिका एक पटक पहिले नै सम्झौताबाट पछि हटिसकेको छ, त्यसैले अब कुनै पनि नयाँ वार्ता वा सम्झौतामा विश्वास गर्ने आधार छैन।”
अराघचीले सहयोगी देशहरू मार्फत अमेरिकासँग सन्देश आदानप्रदान भइरहेको स्वीकार गरे पनि यसलाई औपचारिक ‘संवाद’ भन्न नमिल्ने बताए।
यसैबीच, अमेरिकी राष्ट्रपति डोनाल्ड ट्रम्पले इरानसँग जारी युद्ध आगामी दुई देखि तीन हप्ताभित्र समाप्त हुन सक्ने दाबी गरेका छन्।
मंगलबार राति ह्वाइट हाउसको ओभल अफिसबाट सम्बोधन गर्दै ट्रम्पले भने, “अमेरिकाको मुख्य लक्ष्य इरानलाई आणविक हतियार बनाउनबाट रोक्नु थियो। त्यो लक्ष्य अब पूरा भइसकेको छ।”
ट्रम्पले थप भने, “यो सम्झौता पहिले नै युद्ध समाप्त गर्न पर्याप्त थियो।”
प्रकाशित मिति: १८ चैत्र २०८२, बुधबार
प्रतिक्रिया