काठमाडौं । नेपाली कांग्रेसका नेता तथा समानुपातिक सांसद अर्जुननरसिंह केसी ले आफू र पार्टी सभापति गगनकुमार थापा विरुद्ध ‘ससुरा–ज्वाइँ’ सम्बन्धलाई आधार बनाएर नियोजित रूपमा आक्रमण भइरहेको आरोप लगाएका छन्।
आफूलाई सभापति थापाको ससुरा भएकै कारण अवसर प्राप्त भएको भन्ने आरोपहरू निराधार भएको बताउँदै केसीले त्यस्ता टिप्पणीहरूले आफूलाई कुनै प्रभाव नपार्ने स्पष्ट पारे। उनले आफ्नो राजनीतिक यात्रा लामो संघर्षबाट बनेको उल्लेख गर्दै वि.स. २०१७ पुस १ गते राजा महेन्द्र द्वारा गरिएको ‘कू’ विरुद्ध पर्चा बाँड्दा नै जेल जीवन सुरु गरेको स्मरण गरे।
केसीले पार्टी जीवनमा आफ्नो छुट्टै पहिचान र योगदान रहेको दाबी गर्दै आफूलाई केवल गगन थापाको ससुराको रूपमा मात्र चिनाउने प्रयास गरिएकोप्रति असन्तुष्टि व्यक्त गरे। उनले यस्तो प्रचारलाई योजनाबद्ध षड्यन्त्रको संज्ञा दिँदै यसको प्रतिवाद गरिरहन आवश्यक नरहेको बताए।
उनका अनुसार नेपाली कांग्रेसभित्रैबाट आफ्नो राजनीतिक छवि सीमित पार्ने प्रयास भइरहेको छ, जुन अस्वीकार्य छ। विगतका नेताहरू—गिरिजाप्रसाद कोइराला, शैलजा आचार्य र सुशील कोइराला—को उदाहरण दिँदै उनले पार्टीमा नेतृत्व र भूमिका व्यक्तिगत योगदानका आधारमा स्थापित हुने उल्लेख गरे।
केसीले आफ्नो योगदानबारे यथार्थ जानकारी सार्वजनिक गर्न सञ्चारमाध्यमहरूको भूमिका महत्वपूर्ण हुने बताए। साथै, आफू रूपान्तरण र पुस्तान्तरणको पक्षमा उभिएको र विशेष महाधिवेशनको माग त्यसैको निरन्तरता भएको उनको भनाइ छ।
उनले कांग्रेसभित्र परिवर्तन नचाहने समूहहरूले आफूलाई माध्यम बनाएर सभापति थापामाथि आक्रमण गर्न खोजेको आरोप लगाउँदै त्यसले आफ्नो अडानमा कुनै असर नपर्ने स्पष्ट पारे।
प्रकाशित मिति: २१ चैत्र २०८२, शनिबार
प्रतिक्रिया