एजेन्सी । अफगानिस्तानमा शुक्रबार साँझ ५.८ म्याग्निच्युडको भूकम्प गएको छ, जसमा कम्तीमा आठ जनाको ज्यान गएको पुष्टि भएको छ।
अफगानिस्तान राष्ट्रिय विपद् व्यवस्थापन प्राधिकरणका प्रवक्ता मोहम्मद युसुफ हम्मादका अनुसार भूकम्प को झट्का राजधानी काबुलसहित विभिन्न क्षेत्रमा महसुस गरिएको थियो। काबुलमा एक घर पूर्ण रूपमा भत्किँदा त्यहाँ रहेका आठ जनाको मृत्यु भएको र एक बालक घाइते भएको जनाइएको छ।
भूकम्पको केन्द्रबिन्दु करिब १८६.४ किलोमिटर गहिराइमा रहेको र यसको अवस्थिति ३६.५५ डिग्री उत्तर अक्षांश तथा ७०.८५ डिग्री पूर्व देशान्तरमा रहेको प्रारम्भिक विवरणमा उल्लेख गरिएको छ। गहिराइ बढी भएकाले ठूलो स्तरको क्षति सीमित रहने अनुमान गरिए पनि घर भत्किँदा भएको मानवीय क्षतिले घटनाको गम्भीरता देखाएको छ।
भूकम्पपछि प्रभावित क्षेत्रमा तत्काल उद्धार तथा राहत कार्य सुरु गरिएको छ। स्थानीय प्रशासनले पीडितलाई सुरक्षित स्थानमा सार्ने र घाइतेको उपचारलाई प्राथमिकता दिएको जनाएको छ।
विशेषगरी काबुल र उत्तरी भेगमा भूकम्पको प्रभाव बढी देखिएकाले नागरिकलाई सतर्क रहन र आवश्यक सावधानी अपनाउन प्रशासनले आग्रह गरेको छ।
प्रकाशित मिति: २१ चैत्र २०८२, शनिबार
प्रतिक्रिया