काठमाडौं। अमेरिकी राष्ट्रपति डोनाल्ड ट्रम्पले आर्थिक वर्ष २०२७ को लागि १.५ ट्रिलियन डलरको रक्षा बजेट अनुमोदन गर्न कांग्रेसलाई आग्रह गरेका छन् । यो गत वर्षको तुलनामा अमेरिकी रक्षा बजेटमा ४२ प्रतिशतको रेकर्ड वृद्धि हुनेछ । यदि कांग्रेसले यो बजेटलाई अनुमोदन गरेर कार्यान्वयन गर्यो भने यो आधुनिक अमेरिकी इतिहासको सबैभन्दा ठूलो रक्षा बजेट बन्नेछ ।
ट्रम्प प्रशासनको यो प्रस्ताव इरानसँगको वर्तमान द्वन्द्वभन्दा पहिलेको हो र यसले घरेलु उत्पादन तथा ठूला सैन्य परियोजनाहरूमा ट्रम्पको विशेष ध्यान देखाएको छ । बजेटमा ‘गोल्डेन डोम’ मिसाइल रक्षा प्रणालीको लागि कोष, दर्जनौं नयाँ सैन्य जहाजहरू निर्माण र “ट्रम्प-क्लास” युद्धपोतहरूको नयाँ श्रृंखला निर्माण जस्ता ठूला योजनाहरू समावेश छन् । ट्रम्पले डिसेम्बरमा घोषणा गरेका यी युद्धपोतहरू अमेरिकी नौसेनालाई थप शक्तिशाली बनाउने लक्ष्य राखिएको छ ।
यो बजेट अनुरोध इरान युद्धसँग जोडिएको छुट्टै २०० अर्ब डलरको आपत्कालीन अनुरोधभन्दा फरक रहेको छ । पेन्टागनले इरानमा सञ्चालित ‘अपरेशन एपिक फ्युरी’ लाई समर्थन गर्न र हतियार तथा आपूर्ति पुनःपूर्तिका लागि उक्त २०० अर्ब डलर माग गरेको थियो ।
ट्रम्पको यो ठूलो रक्षा बजेट प्रस्तावले अमेरिकाको सैन्य क्षमता अभिवृद्धिमा उनको उच्च प्राथमिकतालाई स्पष्ट पारिदिएको छ ।
प्रकाशित मिति: २१ चैत्र २०८२, शनिबार
प्रतिक्रिया