काठमाडौं । नेकपा एमालेका महासचिव शङ्कर पोखरेलले लोकप्रियतावाद र अराजकतामा आधारित नयाँ राजनीतिक शक्तिहरूको भविष्य दीर्घकालीन नहुने बताएका छन्। विचार र स्पष्ट सिद्धान्तबिना बनेको एकता टिकाउ नहुने उनको भनाइ छ।
नेकपा एमालेको सम्पर्क विशेष संगठन कमिटीले आयोजना गरेको कार्यक्रममा बोल्दै उनले नयाँ शक्तिहरूबीच देखिएको आन्तरिक द्वन्द्वतर्फ संकेत गर्दै विचार नमिल्ने समूहहरूबीच स्वार्थको टकराव सुरु हुनासाथ विघटन हुने दाबी गरे। रवि लामिछाने र बालेन्द्र शाह बीचको राजनीतिक समीकरणलाई उदाहरणका रूपमा प्रस्तुत गर्दै उनले यस्तो गठबन्धन अस्थायी हुने टिप्पणी गरे।
शङ्कर पोखरेलले नयाँ शक्तिहरूले लोकतन्त्रका आधारभूत संरचनामाथि दबाब सिर्जना गर्न खोजेको आरोप लगाउँदै विद्यार्थी संगठन र ट्रेड युनियनमाथि आक्रमण भएको उल्लेख गरे। उनले एमाले अधिनायकवाद र स्वेच्छाचारिताविरुद्ध दृढतापूर्वक उभिने स्पष्ट पारे। संसद्मा आफ्नो पार्टीको संख्या कम भए पनि भूमिका भने निर्णायक र आक्रामक रहने उनको भनाइ थियो।
उनले भने, ‘जहाँ विचार मिल्दैन, त्यहाँ स्वार्थको टकराव सुरु हुनासाथ विघटन हुन्छ। जुन शक्ति तीव्र गतिमा उदाउँछ, त्यसको पतन पनि त्यत्तिकै छिटो हुन्छ। पपुलिज्मले जनताको वास्तविक समस्या समाधान गर्दैन, केवल भ्रम सिर्जना गर्छ।’
प्रधानमन्त्रीले संसद्मार्फत जनतासँग प्रत्यक्ष संवाद नगरेकोमा असन्तुष्टि जनाउँदै पोखरेलले सुरक्षा निकायका कार्यक्रममा लामो समय बोल्ने तर संसद्मा मौन बस्ने प्रवृत्तिलाई प्रश्न गरे। उनले सांसदहरूलाई संसदीय गतिविधिलाई पार्टीको पुनर्जागरण अभियानसँग जोड्दै सरकारका अलोकतान्त्रिक र गैरकानूनी कदमहरू उजागर गर्न आह्वान गरे।
पोखरेलले वर्तमान सरकार र नयाँ शक्तिहरूले अघि सारेको ‘सुशासन’को दाबीमाथि पनि प्रश्न उठाए। सुशासनको नाममा आएका नेतृत्वहरूले पारदर्शिताको मापदण्ड उल्लङ्घन गरेको आरोप लगाउँदै उनले सभामुखको सम्पत्ति विवरणप्रति समेत शंका व्यक्त गरे। विदेशबाट आर्जित भनिएको सम्पत्तिको स्रोत र कर तिरेको अवस्थाबारे स्पष्ट पार्नुपर्ने उनको माग थियो।
त्यसैगरी, मन्त्रीहरूले सम्पत्ति विवरण सार्वजनिक गर्न ढिलाइ गरेकोप्रति उनले असन्तोष जनाए। एमालेका नेताहरू कुनै पनि प्रकारको परीक्षणका लागि तयार रहेको उल्लेख गर्दै नयाँ शक्तिहरू पनि त्यसका लागि तयार छन् कि छैनन् भन्ने प्रश्न उठाए।
अन्त्यमा, कार्की आयोगलाई ‘प्रतिशोधको औजार’का रूपमा प्रयोग गरी केपी शर्मा ओली माथि दबाब सिर्जना गरिएको आरोप लगाउँदै त्यसको कडा प्रतिवाद गरिने चेतावनी पोखरेलले दिए।
प्रकाशित मिति: २८ चैत्र २०८२, शनिबार
प्रतिक्रिया