काठमाडौं। साझा यातायातले आगामी वैशाख १ गतेदेखि काठमाडौं उपत्यकामा रात्रिकालीन बस सेवा सञ्चालन गर्ने भएको छ ।
बेलुका ८ बजेदेखि ११ बजेसम्म सञ्चालन हुने यो सेवा सुरुमा ७ वटा बसबाट शुरु हुनेछ ।
रुट परीक्षणका क्रममा बुढानीलकण्ठबाट छुटेको बस १६ मिनेटमा महाराजगञ्ज चोक र ४६ मिनेटमा लगनखेल पुगेको थियो भने थानकोटबाट छुटेको बस २१ मिनेटमा कलंकी र ४५ मिनेटमा विमानस्थल पुगेको थियो ।
सोही आधारमा हरेक २० मिनेटको अन्तरमा बस उपलब्ध हुने गरी समयतालिका तयार पारिएको छ ।
दक्षिण रुट : लगनखेल — पाटन अस्पताल — अल्का — नर्भिक — प्रसूति गृह — ट्रमा सेन्टर — वीर अस्पताल — कान्ति अस्पताल — टिचिङ अस्पताल — बुढानीलकण्ठ
(फर्किने बेला महाराजगञ्ज, पानीपोखरी, लाजिम्पाट, जमल, थापाथली हुँदै लगनखेल)
पूर्व-पश्चिम रुट : थानकोट — सतुंगल — कलंकी — कालीमाटी — त्रिपुरेश्वर — सुन्धारा — नयाँ सडक — जमल — बानेश्वर — अन्तर्राष्ट्रिय विमानस्थल
(फर्किने बेला तीनकुने, मीनभवन, बबरमहल, थापाथली हुँदै थानकोट)
नयाँ सडक क्षेत्रलाई मुख्य ट्रान्जिट बिन्दु बनाइएको छ जहाँबाट यात्रुहरूले रुट परिवर्तन गर्न सक्नेछन् ।
यो सेवाको लागि काठमाडौं महानगरपालिकाका कार्यवाहक प्रमुख सुनिता डंगोलको अध्यक्षतामा बसेको बैठकले आवश्यक समन्वय गरेको हो ।
यात्रु सुरक्षालाई ध्यान दिँदै प्रत्येक बसमा ४ वटा सीसीटीभी क्यामेरा जडान गरिनेछ र महानगरले प्रत्येक बसमा एक जना नगर प्रहरी खटाउने भएको छ ।
प्रारम्भिक ३ महिनासम्म सेवा सञ्चालन गरेर यसको प्रभाव मूल्यांकन गरी थप सुधार र विस्तार गरिने कार्यवाहक प्रमुख डंगोलले बताएकी छन् ।
रात्रिकालीन बस सेवा ले विशेषगरी राति काम गर्ने श्रमिक, महिला तथा बेलुका ढिलो घर फर्किने यात्रुलाई सुरक्षित र सहज आवागमनमा ठूलो सहयोग पुग्ने अपेक्षा गरिएको छ ।
प्रकाशित मिति: २८ चैत्र २०८२, शनिबार
प्रतिक्रिया