काठमाडौं । नेपाली नयाँ वर्षको पूर्वसन्ध्यामा आयोजना गरिएको नेपा इभेन्ट्सको बहुप्रतीक्षित कार्यक्रम भव्य रूपमा सम्पन्न भएको छ। २०८२ चैत ३० मा काठमाडौंस्थित द मल्ला होटलमा आयोजित उक्त कार्यक्रममा ४,००० भन्दा बढी दर्शकको उल्लेखनीय सहभागिता रहँदै कार्यक्रमले ऐतिहासिक सफलता हासिल गरेको छ।
नेपा इभेन्ट्सले सधैंझैं उत्कृष्ट अनुभव प्रदान गर्ने आफ्नो पहिचानलाई कायम राख्दै होटल परिसरलाई एक जीवन्त सांगीतिक उत्सवस्थलमा रूपान्तरण गरेको थियो। पुरानो पुस्ताको सम्झना र नयाँ पुस्ताको ऊर्जा मिसिएको कार्यक्रमले दर्शकलाई रातभर मन्त्रमुग्ध बनाएको थियो।
सांगीतिक यात्रा ‘कल्पनिक’ ब्यान्डको साइकडेलिक रक प्रस्तुतीबाट सुरु भएको थियो भने ‘अकाउस्टिक्स’ ले मधुर धुनमार्फत माहोल तताएको थियो। त्यसपछि कुमासागर एण्ड द ख्वोपाले नेवारी लोक स्वाद मिसिएको आत्मीय प्रस्तुती दिँदै दर्शकलाई भावुक बनाएका थिए। लेजेन्डरी ‘द श्याडोज नेपाल’ ले पुरानो रक एन्ड रोलको जादु पुनर्जीवित गराउँदै विभिन्न पुस्तालाई एकैसाथ गाउन बाध्य पारे।
कार्यक्रमको चरम उत्कर्ष भने ‘जोन एण्ड द लोकल्स’ को धमाकेदार प्रस्तुतीसँगै देखियो। उनीहरूले लोकप्रिय गीतहरूसँगै नयाँ धुनहरू प्रस्तुत गर्दै २०८२ सालको अन्तिम घण्टालाई उत्साहपूर्ण बनाएका थिए। मध्यरातको काउन्टडाउनसँगै आतिशबाजी, कन्फेटी र हर्षोल्लासपूर्ण माहोलले नयाँ वर्षको स्वागत गरिएको थियो।
नेपा इभेन्ट्सका प्रमुख कार्यकारी अधिकृत (CEO) दिपेशले कार्यक्रमको सफलताप्रति खुसी व्यक्त गर्दै भने, ‘४,००० भन्दा बढी दर्शकको उपस्थितिमा यस्तो भव्य सफलता हासिल गर्नु हाम्रो लागि गर्वको कुरा हो। हामी छिट्टै नै थप नयाँ र अझ उत्कृष्ट कार्यक्रमहरू लिएर आउनेछौं।’
द मल्ला होटलको व्यवस्थापन टोलीले उत्कृष्ट भीड व्यवस्थापन, सुरक्षात्मक व्यवस्था तथा आतिथ्यताका कारण कार्यक्रमलाई व्यवस्थित र सफल बनाउन महत्वपूर्ण भूमिका खेलेको आयोजकले जनाएको छ।
कार्यक्रम सम्पन्न भएपछि सहभागी दर्शकहरूमा एउटै सन्देश थियो—नेपा इभेन्ट्सले केवल उत्सव आयोजना मात्र गरेन, काठमाडौंमा नयाँ वर्ष मनाउने स्तरलाई नै नयाँ उचाइमा पुर्याएको छ।
प्रकाशित मिति: ३ बैशाख २०८३, बिहिबार
प्रतिक्रिया