वासिङ्टन डीसी । अमेरिकी प्रशासनले विदेशी तत्त्वहरूले औद्योगिक स्तरमा अमेरिकी कृत्रिम बौद्धिकता प्रविधि चोरी गर्ने अभियान सञ्चालन गरिरहेको दाबी गरेको छ।
यसमा विशेषगरी चीनमा आधारित संस्थाहरू संलग्न रहेको उल्लेख गर्दै यसलाई गम्भीर चुनौतीका रूपमा लिइएको छ।
अमेरिकी राष्ट्रपतिको कार्यालयले यस्तो गतिविधि नियन्त्रण गर्न देशका कृत्रिम बौद्धिकता सम्बन्धी कम्पनीहरूसँग थप समन्वय गर्ने जनाएको छ।
विज्ञान तथा प्रविधि नीतिसम्बन्धी जिम्मेवार अधिकारीले जारी गरेको आन्तरिक सूचनामा चिनियाँ संस्थाहरूले अमेरिकी कम्पनीहरूको प्रविधि दुरुपयोग गरिरहेको नयाँ तथ्य फेला परेको उल्लेख गरिएको छ।
उनका अनुसार “डिस्टिलेसन” भनिने प्रक्रियामार्फत ती संस्थाहरूले अमेरिकी कृत्रिम बौद्धिकता प्रणालीको नक्कल गर्ने प्रयास गरिरहेका छन्।
यस प्रक्रियामा हजारौँ प्रयोगकर्ता खाताहरू प्रयोग गरी प्रणालीसँग अन्तरक्रिया गरिन्छ र गोप्य जानकारी संकलन गरेर आफ्नै प्रविधि विकासमा प्रयोग गरिन्छ।
उक्त सूचनामा यस्तो गतिविधिको उद्देश्य अमेरिकी अनुसन्धान तथा विकास प्रक्रियालाई कमजोर बनाउनुका साथै संवेदनशील जानकारीमा पहुँच हासिल गर्नु रहेको जनाइएको छ।
यसलाई रोक्न अमेरिकी प्रशासनले चार प्रमुख उपाय अघि सारेको छ।
जसअन्तर्गत सम्बन्धित कम्पनीहरूसँग आक्रमणका तरिका र संलग्न समूहबारे जानकारी आदानप्रदान गर्ने, आपसी सहकार्य बढाउने, जोखिम पहिचान र नियन्त्रणका लागि मापदण्ड तयार गर्ने तथा यस्ता गतिविधिमा संलग्न विदेशी पक्षलाई जिम्मेवार बनाउने उपाय खोज्ने उल्लेख गरिएको छ।
यद्यपि, दोषी ठहरिएका विदेशी संस्थामाथि कस्तो कारबाही गरिने भन्नेबारे स्पष्ट योजना सार्वजनिक गरिएको छैन।
यस विषयमा वासिङ्टनस्थित चिनियाँ दूतावासले अमेरिकी आरोपको खण्डन गर्दै चिनियाँ प्रविधि विकास आफ्नै मेहनत र अन्तर्राष्ट्रिय सहकार्यको परिणाम भएको जनाएको छ।
साथै अमेरिकाले चिनियाँ कम्पनीहरूलाई अनुचित रूपमा दबाब दिने प्रयास गरेको आरोप पनि लगाएको छ।
कृत्रिम बौद्धिकता क्षेत्रमा काम गरिरहेका केही प्रमुख संस्थाहरूले समेत यस्ता नक्कल गर्ने गतिविधिको सामना गरिरहेको स्वीकार गरेका छन्।
समग्रमा, कृत्रिम बौद्धिकता क्षेत्रमा विश्व शक्ति राष्ट्रहरूबीच प्रतिस्पर्धा बढ्दै जाँदा प्रविधि सुरक्षा र बौद्धिक सम्पत्तिको संरक्षण ठूलो चुनौतीका रूपमा देखिएको छ।
प्रकाशित मिति: ११ बैशाख २०८३, शुक्रबार
प्रतिक्रिया