तेहरान। इरानका विदेशमन्त्री अब्बास अराघची रुस पुगेका छन्।
अमेरिका र इजरायलसँग जारी तनाव तथा द्वन्द्वका बीच इरानका लागि रुसी राष्ट्रपति भ्लादिमिर पुटिनको समर्थन जुटाउने उद्देश्यले उनी मस्को पुगेको बताइएको छ।
पछिल्ला दुई महिनादेखि जारी क्षेत्रीय तनावका बीच शान्ति प्रयासहरू कमजोर बन्दै गएको जनाइएको छ।
यसै क्रममा अमेरिकी पक्षका विशेष प्रतिनिधिहरूको पाकिस्तान भ्रमण स्थगित भएपछि वार्ताको प्रक्रिया थप जटिल बनेको विश्लेषण गरिएको छ।
पाकिस्तान र ओमानजस्ता मध्यस्थकर्ता राष्ट्रहरूसँग छलफल गरेपछि अराघची रुस प्रस्थान गरेका हुन्।
उनको भ्रमणलाई इरानले वैकल्पिक कूटनीतिक समर्थन खोजेको संकेतका रूपमा हेरिएको छ।
अमेरिका र इरानबीच इरानको आणविक कार्यक्रम तथा रणनीतिक रूपमा महत्वपूर्ण हर्मुज जलमार्गको नियन्त्रणजस्ता विषयमा गम्भीर मतभेद कायम छन्।
अमेरिकी राष्ट्रपति डोनाल्ड ट्रम्पले हालै दिएको अभिव्यक्तिमा इरान वार्ताका लागि इच्छुक भए प्रत्यक्ष सम्पर्क गर्न सक्ने बताएका छन्।
उनले सम्झौताका आधारहरू स्पष्ट रहेको र इरानसँग आणविक हतियार हुन नहुनेमा जोड दिएका छन्।
तर इरानले भने युरेनियम संवर्धन गर्ने आफ्नो अधिकार स्वीकार गरिनुपर्ने अडान दोहोर्याउँदै आएको छ।
क्षेत्रीय द्वन्द्वका कारण विश्व अर्थतन्त्रमा समेत असर परेको छ।
खाडी क्षेत्रमा तेल ढुवानी प्रभावित हुँदा अन्तर्राष्ट्रिय बजारमा तेलको मूल्य बढेको र आर्थिक अनिश्चितता बढेको बताइएको छ।
युद्ध हाल केही शान्त भए पनि स्थायी समाधानका लागि कुनै औपचारिक सहमति हुन सकेको छैन।
इरानले हर्मुज जलमार्गमा जहाज आवागमन नियन्त्रण गर्न सक्ने क्षमता प्रयोग गर्दै वार्तामा दबाब बढाइरहेको छ भने अमेरिकाले इरानी बन्दरगाहहरूमा नाकाबन्दी कडा बनाएको बताइएको छ।
यसैबीच, इरानी राष्ट्रपति मसुद पेशेश्कियानले पाकिस्तानी प्रधानमन्त्रीसँगको वार्तामा दबाब वा नाकाबन्दीका अवस्थामा गरिने सम्झौता स्वीकार्य नहुने स्पष्ट पारेका छन्।
उनले पहिला अमेरिकी अवरोध हटाइनुपर्ने सर्त राखेका छन्।
अमेरिकाले इरानको आणविक कार्यक्रमसँगै उसका क्षेत्रीय सहयोगी समूहहरूमाथिको समर्थन पनि सीमित गर्न चाहेको बताइएको छ।
इरानले भने आर्थिक प्रतिबन्ध हटाउन र आफ्ना सहयोगीमाथि भइरहेका आक्रमण रोक्न माग गरेको छ।
प्रकाशित मिति: १४ बैशाख २०८३, सोमबार
प्रतिक्रिया