काठमाडौं। अमेरिकी संसद्को सशस्त्र सेवा समितिमा भएको सुनुवाइका क्रममा अमेरिकी रक्षा विभाग (पेन्टागन) ले इरानसँगको सैन्य कारबाहीमा हालसम्म ठूलो रकम खर्च भएको जानकारी दिएको छ।
पेन्टागनका वित्त प्रमुख जुल्स हर्स्टका अनुसार इरानसँग सम्बन्धित युद्ध तथा सैन्य अपरेसनमा अमेरिकाले अहिलेसम्म करिब २५ अर्ब अमेरिकी डलर खर्च गरिसकेको छ।
उक्त रकमको ठूलो हिस्सा हतियार, सैन्य सामग्री तथा सञ्चालन खर्चमा प्रयोग भएको बताइएको छ।
यो विवरण अमेरिकी कांग्रेस सदस्य एडम स्मिथले उठाएको प्रश्नको जवाफमा सार्वजनिक गरिएको हो।
स्मिथले सरकारसँग युद्धको पूर्ण लागतबारे पारदर्शिता माग गर्दै भविष्यमा थप विस्तृत विवरण उपलब्ध गराउन आग्रह गरेका थिए।
सुनुवाइमा रक्षा मन्त्री पिट हेगसेथले इरानको आणविक कार्यक्रमलाई लिएर चिन्ता व्यक्त गर्दै विगतका सम्झौताहरूले समस्या समाधान नगरेको दाबी गरे।
उनले इरानले आफ्नो आणविक महत्वाकांक्षा नत्यागेको भन्दै अमेरिकाले इजरायलसँग सहकार्य गरेर आवश्यक कदम चालेको बताएका छन्।
अमेरिकी पक्षका अनुसार इरानसँगको तनाव केवल सुरक्षा मात्र नभई मध्यपूर्वको समग्र भू–राजनीतिक स्थिरतासँग पनि जोडिएको विषय हो, जसका कारण रक्षा खर्च निरन्तर बढिरहेको छ।
प्रकाशित मिति: १७ बैशाख २०८३, बिहिबार
प्रतिक्रिया