काठमाडौं । नवलपरासी (बर्दघाट सुस्ता पूर्व) । कावासोती नगरपालिका–८ कालीगण्डकी चोकस्थित पूर्व–पश्चिम राजमार्गमा भएको सवारी दुर्घटनामा एक जनाको मृत्यु भएको छ भने एक जना घाइते भएका छन्।
आज बिहान फलफूल चोकबाट डण्डातर्फ जाँदै गरेको ग प्र ०४–००२ प २६२५ नम्बरको स्कुटर सडक किनारमा रोकिराखिएको प्र नं २–०४–००१ ख ००८२ नम्बरको ट्रकको पछाडिको भागमा ठोक्किँदा दुर्घटना भएको हो।
दुर्घटनामा हुप्सेकोट गाउँपालिका–२ की निशा कुमाल गम्भीर घाइते भएकी थिइन्। उपचारका लागि चितवन पठाइए पनि उपचारकै क्रममा उनको मृत्यु भएको जिल्ला प्रहरी कार्यालय नवलपरासी (बर्दघाट सुस्ता पूर्व)का प्रहरी उपरीक्षक युवराज खड्काले जानकारी दिएका छन्।
त्यस्तै, स्कुटर चालक कावासोती नगरपालिका–८ का ३७ वर्षीय शंकर श्रेष्ठ घाइते भएका छन्। उनको भरतपुरमा उपचार भइरहेको प्रहरीले जनाएको छ।
घटनाबारे थप अनुसन्धान भइरहेको प्रहरीले जनाएको छ।
प्रकाशित मिति: १९ बैशाख २०८३, शनिबार
प्रतिक्रिया